Bildeserie:
Handballherrane til Os tok søndag imot serieleiar NHHI i Oshallen.
Det blei som venta ein hard kamp mot raske og sterke studentar.
– Det var ein opptur å klara å kjempa i 2 x 30 minutt, vi som har vore svake i 2. omgang i dei fleste kampane i år.
– Men dei blei for gode for oss, seier eldstemann på Os, Joachim Nøkleby, som måtte finna seg i å tapa på bursdagen sin.
Os - NHHI 20 - 32 (10-17)
Målskårarar, Os: Jørgen Wold 5, Øystein Skarding 4, Joachim Nøkleby 3, Ove Lyssand 3, Isak Røen 2, Trygve Dahl 2 og Joakim Blostrupmoen 1.
Os-keeper Andreas G. Sennesvik hadde fleire fine redningar, men NHHI kjørte høgt tempo og fleire fine angrepssystem, så AGS-en måtte også sjå ei rekke skot gå i nota.
Keeper-veteran Hans Brunvatne (40) var inne og redda ein straffe, men returen gjekk inn.
Offensivt drog Os på seg ein del brot og stillinga gjekk frå 1-2 til 4-8. Og det var ikkje alle gongane Os fekk lausna gode skot at dei gjekk inn heller, NHHI-keeperen var veldig stødig.
– Kjekt å slå Os
– Det er alltid kjekt å slå Os, seier osingen og NHHI-spelaren Arne Veim Haugland.
Sjølv skåra han tre mål for NHHI.
– Spesielt etter at Nøkleby etter førre kamp, der vi leia 18-4 til pause, meinte at vi var eit lag Os kunne slå, ler han.
Ny heimekamp laurdag
– No får vi satsa på å ta litt fleire poeng i innspurten, så vi held oss i divisjonen, seier Nøkleby.
Os ligg på 10. plass av 12 lag, men med færre spelte kampar enn dei fleste andre i avdelinga.
Neste kamp går også i Oshallen, førstkomande laurdag tar Os imot FyllingenBergen 2, som frå før har vunne 7 og tapt 8 kampar.