Slo Fusa 5-1

Bildeserie:

1 av 10

Tidlegare Os 2-spelar Kjartan Svendsen og tidlegare Os-spelar Remi Osebakken kom i dag til Kuventræ for å spela andre runde i serien mot Os 2 i 5. divisjon. Med seg hadde dei også keeper Martin Tysseland, som er på utlån frå Os til Fusa.

SJÅ VIDEO NEDST I ARTIKKELEN

Os 2 spelte i 4. divisjon i fjor, Fusa skulle rykt ned til 6. divisjon, men fekk halda på plassen og hamna i avdeling med Os 2 og Søre Neset.

Søre Neset, som tapte serieopninga 4-0 for Oslvik tapte i går 4-0 for NHH 2. Oppgjeret mellom Os 2 og Fusa blei jamnare og tøffare enn resultatet tilseier.

Os 2 - Fusa 5-1 (1-1)
Målskårarar, Os: Sjølvmål, Håkon Kvittingen, Tor Erik Kjosås Berge, Ramo Racic og Anders Kinden.

Gjestane tok leiinga etter ein corner og første omgang blei jamn. Os 2 utlikna på eit sjølvmål før pause. I 2. omgang var heimelaget rask med å ta leiinga i ein situasjon Fusa-trenar Håvard Ragnhildstveit er lite nøgd med.

– Midtstopparen vår gjekk ned med skade i hovudet. Vi rakk å informera dommar, som ikkje bles av, og motspelarar, som vi hadde håpa skulle sparka ballen ut over sidelinja, i staden blei det 2-1-skåring.

– Etter dette kom vi ikkje skikkeleg inn i det igjen, seier Ragnhildstveit.

Fleire bomskot

Fusa var likevel framleis farleg, og hadde sine raid mot Os 2-målet. Men keeper Frode Moberg Øvredal klaska dei beste skota ut til corner.

Os 2 hadde også sine fine, men resultatlause angrep. Ramo hadde eit langt løp åleine mot keeper, men gjekk med ballen til keeper storma ut og tok den.

Både Ramo og Espen Borgen hadde skot i stanga, Ramo sitt var av litt spesiell sort, på innsida av venstre stang gjekk ballen bak keeper, men utanfor høgre stang, for så å trilla ut over dødlinja.

Delar av kampen var prega av tøffe taklingar og det blei delt ut fleire gule kort. I den eine taklinga mellom ein ballsikker Fusa-angripar Stian Håvik og fusingen og Os-spelaren Tor Erik Kjosås Berge, braut Håvik opp igjen ein skulderskade han nyleg blei frisk igjen frå.

Perle frå Berge

Fusingen og Os-spelaren Tor Erik Kjosås Berge, som er kjent for sin gode frispark-fot, fekk eit par fine forsøk også i dag, og det eine forsøket gjekk rett inn til 3-1.

– Det var spennande fram til denne skåringa, men etter 3-1 hadde vi kontroll, seier Os-trenar Frode Øye.

Øye er dessutan svært nøgd med dagens midtstopparar, Bjarte Halhjem og John Ole Johannessen.

Ramo feila ikkje då han kom på nytt rais mot Tysseland i Fusa-målet, og auka til 4-1 med venstrefoten.

Ein corner av Berge kort tid før slutt landa på hovudet til Anders Kinden, som spikra inn 5-1.

Os 2: Frode Moberg Øvredal - Tor Erik Kjosås Berge, Bjarte Halhjem, John Ole Johannessen, Even Olsen - Håkon Kvittingen, Steffen Ludvigsen, Ørjan Glesnes, Glenn Krossøy - Anders Kinden og Ramo Racic.

Innbytarar med speletid: Espen Borgen, Thomas Mjelva og Aleksander Nielsen.

Os 2 sin neste kamp går borte mot Fitjar søndag om ei veke. A-laget til Os speler heime mot Stavanger dagen før (kl 16).