Slo Sædalen på heimebane

Bildeserie:

1 av 6

Os 2 har spelt to kampar mot Sædalen etter ferien. Etter 3-3 borte blei det ein grei siger heime søndag kveld.

Os 2 - Sædalen 4-1 (3-1)
Målskårarar, Os 2: Alexander Mjånes Tøssebro, Øystein Takle Eide, Fabian Bødtker og Mats Fjelltveit.
Tropp og kampdetaljar på fotball.no

– Vi fekk ein god start og gjekk opp i 1-0 i 2. speleminutt. Simon Moberg Søvik, som har ein fantastisk pasningsfot, sendte Alexander Tøssebro gjennom så han kunne setja ballen mellom beina på keeper og i mål, fortel trenar Karl Kvile.

2-0 kom på heading av Øystein Takle Eide, mens Fabian Bødtker skåra på straffe. Bødtker fekk to forsøk. Sædalen-keeperen redda den første, men, ifølgje dommaren, hoppa han fram før den første straffen blei sendt frå 11-metersmerket.

– På 3-1 klarerte vi før ballen var inne. Spelarane klagde, men eg protesterte ikkje på dommaravgjerda. Det er gjerne lett å vera raus når du leiar 3-0, seier Kvile og ler.

– Varierer for mykje

Midtsiden fekk med seg 2. omgang, der Os 2 heldt fram med å skapa sjansar, fekk nokre innlegg og hadde Tøssebro forbi keeper, men der gjestane òg var langt frå ufarlege.

– Fleire av spelarane, spesielt dei med høgt toppnivå, varierer dessverre for mykje i prestasjonane. Mykje av det handlar om konsentrasjon og om arroganse i spelestilen, noko som fører til dumme pasningsval og dumme balltap. På dette nivået slepp du ofte unna med det, men det var nær på nokre gongar, for eg synest Sædalen stilte med nokre spelarar med veldig bra power og trøkk.

Omgangens einaste skåring kom rett før slutt. Etter å ha vore eit angrep åleine, men avslutta i stolpe og utanfor, tok lynraske Øystein Takle Eide seg til dødlinja og slo 45 gradar inn til Mats Fjelltveit.

– Øystein Takle Eide og Joakim Forstrønen har ein enorm fart, og eg ønskjer at dei begge skal bli meir ego, at ikkje dei alltid ser etter andre. Men akkurat her var det fint av Takle Eide å legga inn, og ei bra avslutting av Mats, som kom til oss frå Brann i sommar.

– Mats er ein av dei eg har trent i Fyllingsdalen tidlegare, og som var med då dette laget vann Norway Cup.

Klarer ikkje å rykka opp

Også i resultat har Os 2 variert ein del.

– Det er vanleg blant unge spelarar og det er botnnivået eg vil prøva å heva. Det er for stor uvisse frå kamp til kamp kva dagsform kvar enkelt har.

Målet om opprykk og comeback i 4. divisjon blir ikkje nådd.

– Det er kjedeleg å erkjenna, men kanskje like greit med tanke på alderssamansetjinga på dette laget. Samtidig ser eg at ein del spelarar har utvikla seg veldig, som for eksempel Kristoffer Røttingen, og hausten plar normalt vera betre enn våren på unge lag som dette.

– Eg vurderer òg å kutta ut éin treningsdag i veka. David Nielsen gjorde det same med Nest-Sotra då dei rykte opp. Han blei skulda for å ikkje gidda å pendla så mykje, men så viste han resultat. Desse ungdomane trener allereie mykje, det har òg hendt at dei har kome rett frå Cooper-test på skulen til kamp med laget. Ein fridag kan kanskje gjera at dei kjem meir konsentrerte på trening og kamp.