Slutt for Milly-Molly-Mandy

Milly-Molly-Mandy & Co hadde tysdag sin siste opningsdag på AMFI Os.

Kjetil Vasby Bruarøytorsdag 14. okt. 2010 08:04

Det er nesten tre år sidan Tina Nordvik opna den koselege butikken med barneklede, leikar og antrekk for gravide.

Etter to år i Landboden i Os sentrum flytta butikken til 2. etasje i AMFI Os, i noko utvida versjon, men med same fokus på kvalitet og miljø.

- Omsetnaden auka, men dessverre ikkje nok i forhold til utgiftene med høgare husleige og utvida opningstider, seier Tina.

Eigaren meldte oppbod tidlegare denne veka og tysdag 12. oktober blei siste opningsdag.

Tilbod heile året
Nordvik seier ho framleis har tru på eige konsept, men trur Os er for liten stad for ein sånn butikk.

- Folk fekk endra kjøpemønster som følgje av finanskrisa, noko som er positivt, men ikkje for dei som driv butikk.

- Samstundes øydelegger marknaden mykje for seg sjølv, folk har blitt vane med å handla på tilbod heile året, då blir det ikkje enkelt for små nisjebutikkar å selja til fullpris.

- Kva skal du driva med no?

- Det er ikkje bestemt. Førebels synes eg det er greit å ha runda av butikken, eg ville gje meg medan leiken var god.