Slutt på revestrekane

Sidan Os og Fusaposten og BT.no i august slo stort opp at ein sjuk rev hadde vore på drapstokt på Kuhnle har jegerar i området Kuhnle - Halhjem vore på utkikk etter den.

- VI har jo vore obs på rev når vi har vore ute i terrenget, men før tysdag har vi ikkje sett noko til den, fortel Alf Haugland.

Då han sat på hjortepost saman med Bjørn Orrebakken kom raudreven tuslande.

- Vi har ei åtehole med noko nedgravd hjorteavfall som den truleg kjende lukta av.

Destruert

Reven kom på skothald og enda sine dagar for hjortejegeren si kule.

- Om det er den som har herja på Kuhnle eller om dette er ein annan veit vi jo ikkje, men no er det i alle fall éin mindre som kan gjera skade.

Dyret dei skaut skal ha vore skabbate i pelsen. Reven har dei levert vidare til destruksjon.

Fleire revar?

Fleire gongar i sommar har sørenesingar hatt besøk av rev i hagane sine.

Les òg:

Bjørn får besøk av rev
Ingen hare-hopp?

I august fortalte ein Midtsiden-lesar om observasjon av to rev i Naustvågen på Halhjem.

– Dei virka sjuke og var ikkje redde, skriv vedkomande, som sendte oss bilde av ein av revane.

Det spørs om ikkje jegerane framleis bør halda augene opne etter reven.