Snart blir dette forbode

Har du vore frustrert over at du ikkje har fått luke frå begge sider og stått lenge før du kunne svinga til venstre ut frå Øyro ved Lundehjørnet? Eller endå verre, stått bak ein nølande bilist som ikkje har tatt dei lukene som kom?

Mens Midtsiden sto for å fotografera fekk vi tre tilfelle på rad der bilar på veg til venstre, trass at dei stakk nasa litt fram, ikkje fekk goodwill frå ein einaste av bilistane på veg mot sentrum på Byvegen.

Dette blir det snart slutt på, i alle fall for ein periode.

I samband med stenging av nordgåande felt på E39 frå 2. mai, og medfølgjande sterkt aukande trafikk gjennom Os sentrum, vil Os kommune ta ei justering.

Les òg: 1500 ekstra bilar per dag

– Når kjørefeltet nord for Moberg blir stengt blir det òg forbode å svinga til venstre frå Øyro til Byvegen, seier teknisk sjef Marianne Kramer.

Dei som skal retning Hatvik eller Halhjem får køyra ut ved rådhuset, direkte i rundkøyringa, eller ut Brugata, der det òg er forbode å svinga til venstre.

– Det er vanskeleg å koma seg ut ved Lundehjørnet og bilar som vil til venstre kan laga lange køar inn i sentrum, forbi krysset inn mot Telthuskvartalet.

– Dette er allereie eit problemkryss i dag, er det mogleg at venstresving-forbodet blir permanent?

– Det er ingen vedtak på det, men det er ikkje umogleg.

Kva med Idrettsvegen?

Eit anna kryss mellom Moberg og Svegatjørn, via Os sentrum, der det ofte hopar seg opp er ut frå Idrettsvegen.

Frå Idrettsvegen kjem trafikk frå bustadområda Varåsen og Furulunden, skulane Os Gymnas og Kuventræ barneskule, Os Turn og Os kommune sine idrettsanlegg på Kuventræ, Oshallen og Osbadet. I tillegg kjem kundane til Rema 1000.

– Vi har førebels ingen plan om å justera på dette krysset eller på utkøyringa frå Gymnasvegen, som går parallelt.

– Ut frå Idrettsvegen er det plass til to felt, men ikkje merkt av. Har du ein bil som legg seg i midten, men skal til venstre, kan den hindra mange som skal til høgre. Hadde det vore ein idé å merka utkøyringa med to felt?

– Ja, det kan godt henda, det vil vi sjå nærmare på, seier Kramer.

Sjå òg: Midtsiden si samleside om E39 Svegatjørn-Rådal