Snudde kampen på ein dårleg dag
Lysekloster låg under to gongar og sleit hardt mot Lyngbø. Likevel blei det full pott.
Bildeserie:
Laurdag ettermiddag tok Lysekloster imot Lyngbø til 18. serierunde.
På bortebane blei det 3-2-tap, også i dag var Lysekloster nær på å gå poenglaus av banen.
Lysekloster - Lyngbø 3-2 (0-1)
Målskårar: Steffen Finsådal (53.), Thomas Helland (67.) og Preben Borgen (80.). Jonas T. Hesvik skåra begge måla til Lyngbø (31. og 55.).
Gule kort, Lysekloster: Thomas Helland, Aleksander Andersen og Preben Borgen
Lysekloster (4-3-3): Chris S. Midtun - Baste Jonassen, Tore Valvik (Mattias Høiland 63.), Aleksander Andersen, Sigve Rørstad - Simen Birkelund, Preben Borgen, Martin Eidsvik (Steffen Finsådal 45.) - Johannes Jordal, Endre Hansen (Stefan Bernsen), Thomas Helland.
Heimelaget opna greit og Thomas Helland hadde skot på mål i første speleminutt. Men dei første 15-20 minutta av kampen var det Lyngbø som styrte showet og skapte dei største sjansane.
I 31. minutt, ti minutt etter at Lysekloster hadde byrja å få til meir, hadde sjansar og fleire cornarar, kom gjestane på ein overgang og sette inn 0-1. Minuttet etter var dei nær på å auka til 0-2, men ballen gjekk rett utanfor.
Fredrik F. Nillsen på Lyngbø og Thomas Helland fekk gult kort i første omgang, begge for munnbruk.
To utlikningar etter pause
Steffen Finsådal, som kom for seint til kamp grunna jobb, blei skifta inn for Martin Eidsvik i pausen. Finsådal brukte 8 minut på å få ballen i mål.
Lysekloster hadde ein dobbeltsjanse i 48. minutt, der ein forsvarsspelar redda skot av Endre Hansen på strek og keeper redda returen.
I 53. minutt blei det corner og her var Finsådal klart høgast i feltet og heada inn 1-1.
Men to minutt seinare var det corner til Lyngbø og Jonas T. Hesvik sette inn sitt andre for dagen.
Thomas Helland klinte til i 65. minutt, men ballen gjekk utanfor. To minutt seinare fekk han ein ny sjanse og banka inn 2-2 på halv volley.
Brente sjansar av gjestane
Lyngbø heldt fram med temposterkt offensivt spel. På Kuventræ slo dei Os 1-2 og også Lysekloster var i store delar av kampen for svake i duellane og for sein med å vinna igjen ballen.
Gjestane hadde raid med skot rett over mål fire gongar i andre omgang, og fekk seks frispark på Lysekloster sin banehalvdel etter pause. Fleire av frisparka i første omgang kom etter at Lysekloster-spelarar klatra på motspelar for å vinna hovudduellar.
Baste Jonassen redda ein ball på strek, som Lyngbø meinte var over mållinja, og i siste spele-sekund heada Lyngbø rett utanfor lengste stolpe på corner.
I forkant hadde Preben Borgen sett inn ein retur etter ny heading av Finsådal, og 3-2 sto seg dei siste ti minutta og fram til dommaren bles av.
Alle topplaga vann
Serieleiar Odda vann 4-2 borte over Vadmyra i dag og Sotra held seg på 2. plass etter 3-2 over Bjarg.
Lysekloster er likevel med i toppen etter full pott i dag og har 35 poeng mot Odda sine 41 og Sotra med 39.
Os speler 18. runde heime mot Fyllingsdalen 2 i morgon, og har 27 poeng før kampen.