Hansen og Matos kan vera skuffa over å ikkje få med seg meir enn eitt poeng heim frå Stavanger. Her i treningskampen mot Tertnes før sesongen (foto: KVB)

Snytt for to poeng

Lysekloster uavgjort mot Viking 2 etter 1-1. Utligninga til Viking kom på billig straffe.

Av: Andris Hamre

Laurdag spelte Lysekloster borte mot Viking 2 på Viking Stadion. Etter ein jamn første omgang tok gjestane leiinga med Marcus Sannes etter 56 minutt.

– Målet kom etter eit fantastisk angrep på venstresida kor Eirik Rode slår hardt inn langs bakken som Marcus styrer inn i lengste, fortel trenar Ruben Hetlevik.

Viking 2 - Lysekloster 1-1 (0-0)

Lysekloster sitt lag: Kjetil Hansen, André Matos, Eirik Rode, Mats Walberg, Thorvald Trætteberg, Denis Ljubovic, Mohammad Hasan Rahmani, Rune Åsheim Mo, Vladan Radojkic, Truls Hovland, Kristoffer Østervold.
Innbyttarar med speletid: Martin Pedersen, Niklas Lunde Fosen, Marcus Sannes Thormodsen

Sjå tabellen 

Styrer kampen

I andre omgangen er det Lysekloster som styrar spelet.

– Vi har god kontroll og pressar dei høgt slik at dei ikkje klarer å komma seg ut av forsvaret før dei heilt på slutten prøver seg på ein sluttspurt.

– Eg tykkjer vi gjer ein veldig god bortekamp kor gutane gjer ein vasken og profesjonell prestasjon. Vi skaper nok sjanser til å skåra meir enn det eine målet vi får, men det skal halde med ett mål borte i ein kamp som dette.

Frykteleg skuffa

Utligninga kjem på straffe med berre fem minutt att av kampen.

– Blei de snytt for to poeng?

– Ja eg tykkjer det. Staffa kjem etter ein corner som blir heada unna. Etter ein duell i lufta lander Matos ein meter innanfor 16-meteren. Ballen sprett opp i handa hans utan at nokon er i nærleiken og dommaren peiker på straffemerket.

– Dette var vel eigentleg den einaste skikkelege sjansen til Viking 2, så det er klart vi er skuffa i dag, avsluttar Hetlevik.

Fleire saker