Robin Hjertnes sette inn 2-0 for Søre Neset. (Arkivfoto: KVB)

Søre Neset vann toppkamp

Både Søre Neset og Nore Neset vann i helga. Søre Neset, som har mista Egil Thuen, er no på 2. plass på tabellen.

Av: Kjetil Vasby Bruarøy

Søre Neset/Nore Neset-samarbeidet ser ut til å fungera bra, i helga vann begge kvar sine toppkampar.

Søre Neset/Nore Neset 1 spelte fredag mot serieleiar i 6. divisjon, Sædalen, som sto utan tap før kampen.

Søre Neset - Sædalen 2-0 (1-0)
Målskårarar: Ruben Grindevoll og Robin Hjertnes

– I bortekampen skapte vi veldig mykje, men måtte nøya oss med 2-2. Fredag var vi endå eit hakk kvassare og tok ein fortent siger, meiner trenar Kenneth Svenningsen.

Ruben Grindevoll sette inn 1-0, to gongar.

– Etter den første skåringa såg eg at nokre spelarar gjekk inn i ein lang diskusjon med dommaren, som endte med å lata seg overtala til å annulera skåringa grunna offside. Det skapte litt temperatur, men Ruben skåra nok ein gong og vi gjekk i leiinga før pause.

Robin Hjertnes sette inn 2-0 i 2. omgang og Søre Neset, som med det tok sin fjerde siger på rad, ligg no på 2. plass på tabellen.

Søre Neset sin stall har vore stabil i sommar, med unntak av at dei har mista Egil Thuen, som har flytta til Karmøy for å studera.

Suverene Nore Neset

Nore Neset rykte ned til 7. divisjon i fjor og Nore Neset/Søre Neset 2 viser at laget vil tilbake i 6. divisjon.

Les òg: 21 mål på 2 kampar

Søndag kveld spelte dei heime mot Loddefjord 2, det einaste laget dei har tapt for i år (4-3), og fekk ei søt hemn.

Nore Neset - Loddefjord 2 5-1 (3-0)
Målskårarar: Nikolaj Bigom 2, Espen André Sælen, Aleksander Havsgård og Christoffer Leikvoll Storvik.

Nore Neset tronar naturlegvis framleis på toppen av tabellen, 9 poeng framfor Njardar/Tysnes på 2. plass.

 

Fleire saker