Spanderer på julaftan
For dei fleste er jula ei høgtid der familien samlast rundt middagsbordet. Men ikkje alle har det sånn.

Oseana Kafé og Restaurant opnar både dørene og kjøleskapet 24. desember.
- Vi vil invitera alle som ønskjer det til å koma på gratis julelunsj i Oseana juleaftan, fortel restauranteigar Anne Rita Mjelstad.
Borna snakkar om det enda
Det var mannen hennar og medeigar, Roald, som kom med ideen om å gleda osingar med skikkeleg julemat.
- Eg har vore med på det same i Beregn for fleire år sidan, og tok då ungane med meg, fortel Roald.
- Det gjorde stort inntrykk på oss og ungane snakkar om det enno.
Roald har lenge tenkt på å få til noko liknande og no var endeleg rette tida komen til å gjennomføra det.
- Eg kontakta Ole Tobias Lindeberg, direktør i Oseana, som er positiv til det meste. Dette var ikkje noko unntak.
- Det er eit kjempefint tiltak, synest Lindeberg.
Dagleg leiar Ernst Petter Hansen var heller ikkje vanskelig å få med, og saman med familiemedlemmane sine kjem dei til å tilbringa dagen 24. desember i Oseana.
- Vil så veldig gleda andre
Med seg på laget har dei ivrige sjelene fått med seg leverandørane sine til å sponsa maten.
Det vil bli servert pinnekjøt med tilbehør, dessert, kaffi og drikke.
- Vi hadde ikkje klart det uten hjelp frå Tine, Nortura, Bama og Hansa, og dei var lette å få med på opplegget vårt, seier Mjelstad.
Sidan dei tilsette har juleferie er det sjefane sjølv som skal stå for matlaginga.
- Det er dessverre begrensa med plassar så dei som ønskjer å koma må melda seg på julelunsjen innan 20. desember ved å ringa oss eller ta kontakt direkte i restauranten.
- Vi har veldig lyst å gjera dette, å gleda andre i jula, så her er alle hjarteleg velkomne, avsluttar Mjelstad.