Speler mot Fana i kveld
Handballdamene til Os førebur seg på ein tøff start på 2013. I kveld speler dei treningskamp i Oshallen mot 1. divisjonslaget Fana.
Os avslutta haustsesongen med 28-27-siger over Bergen HK og ligg på 3. plass på tabellen, 1 poeng bak Kjøkkelvik, som har spelt 2 kampar meir, 8 poeng bak Jotun, som har spelt 1 kamp meir.
2013 startar for Os sin del med to bortekampar mot nettopp Jotun og Kjøkkelvik, så damelaget til Os er i full trening gjennom jula.
– Vi trener styrke og handball kvar dag frå 2. juledag til nyttår, fortel trenar Erlend Lyssand.
Os har også ordna seg god matching i jula, i kveld speler dei treningskamp mot Fana, som rykte opp til 1. divisjon etter førre sesong.
– Fana trener også hardt i romjula, og sjølv om dei berre har tatt 9 poeng til no i 1. divisjon, har dei spelt jamt og godt også i kampane dei har tapt.
Det blir ikkje billettsal på tribunen i Oshallen i ettermiddag, men treningskampen, som startar klokka 18.00, er open for publikum.
Os stiller, med unntak av Line Hjelle Berentsen, som er vekke, med full tropp.