Sprang frå Årstad
Då handballdamene til Os skrudde opp tempoet hang ikkje Årstad med. Osdamene sprang inn til 33-22 siger.
Tysdagens kamp i Haukelandshallen starta jamt. Dei to laga følgde kvarandre om lag halvvegs ut i førsteomgangen på stillinga 8-9 og 9-10.
- Det siste kvarteret i 1. omgangen er svært bra.
- Då rykker vi ifrå og let Årstad skåra berre éin gong, fortel trenar Erlend Lyssand.
I den perioden spring Os raskare enn Årstad klarer å henga med. Tonje Hjertnes og Anna Bjørke Kallestad viser at det ikkje noko i vegen med tempoet, og når Vibeke Ingebrigtsen i mål i tillegg serverer den eine kontringsballen etter den andre ser Årstad seg nøydd til å ta time-out på stillinga 9-15 i håp om å stoppa Os-ekspressen.
Det klarer dei ikkje, og Os kan gå til pause på stillinga 10-18.
Slepp ungdommane til
Utover i andreomgangen er det ikkje tvil om at sigeren skal bli med sørover til Os.
Erlend Lyssand lar difor ungdommane få sleppa til, mellom anna får Malin Lunde Fosen sin debut i 2. divisjon og gjer seg absolutt ikkje bort.
- Det er ein bra gjennomført kamp.
- Vi får til mykje av det vi har trent på den siste tida.
- I tillegg set jentene eit solid forsvar og viser mykje speleglede, smiler Lyssand etter kampen.
Anna tok ansvar
I toppskårar Irene Tangerås sitt fråvær tar ungjenta Anna Bjørke Kallestad ansvar og bankar heile 10 mål i nettet bak Årstad-keeperane.
God framover er òg Tonje Hjertnes, som har heva skotkvaliteten sin med fleire hakk denne sesongen, og har blitt svært så sikker frå vingen.
Bakover går to av dei mest rutinerte, Emilie Hjertnes og Marte Øvreeide, framfor som gode eksempel og deler ut juling kvar gong Årstad-skytterane kjem innanfor 9-meteren.
Årstad - Os 22-33 (10-18)
Tilskodarar: 35 (20 av dei frå Os)
Utvisingar: Årstad ingen, Os 2x2 min
Os sitt lag: Marte Haugsdal (3), Anna Bjørke Kallestad (10), Tonje Hjertnes (6), Emilie Hjertnes (2), Marte Øvreeide (1), Line Hjelle Berentsen (3), Vibeke Ingebrigtsen, Elise Hjelle (4), Vilde D. Fyllingen (1), Malin Lunde Fosen, Vilde Brattabø (3).
Etter sigeren legg Os seg på 3. plass likt på poeng med Kjøkkelvik på 2. plass, men med dårlegare målforskjell.
Neste kamp er heime mot Bergen HK 15. desember, men før det inviterer ungjentene til Os til Bring-serie mot Follo, Fjellhammer og Sarpsborg 8. og 9. desember i Oshallen.