Sprang frå gamlekara
Ungutane på Os let seg ikkje lura av rutinerte karar på Norrøna, men sette fart og vann med over 10 mål.
Bildeserie:
Seint onsdag kveld spelte herrelaget til Os sin andre kamp denne sesongen. På motsett banehalvdel var ein gjeng rutinerte karar frå Norrøna, som nok kunne vore fedre til dei fleste av Os-spelarane.
– Norrøna er vanskelege. Dei har så mykje rutine og lure knep at eg er spent på korleis dette skal gå, fortalte Kenneth Husebø, som er tilbake som trenar for herrelaget, før kampen.
Gjorde det dei skulle
Etter kampen er det ein nøgd Husebø som oppsummerer.
– Norrøna maser og kjaser som dei pleier, men gutane våre gjer som dei skal og let seg ikkje lokka utpå.
– Førsteomgangen er greit gjennomført. Andreomgangen er kjempebra. Då gjer vi ting enklare, held avstand i angrepet og markerer tydeleg i forsvar.
Kampen starta jamt med 2-2 etter åtte minutt, før Os rykte sakte, men sikkert i frå til 6-4 etter 19 minutt og 11-9 til pause.
Fekk justert samarbeidet
I andreomgangen tar Os styringa frå start, noko som gjer at sigeren ikkje er truga. Etterkvart som leiinga aukar gir Norrøna-karane meir eller mindre opp og Os vinn komfortabelt 27-15.
– Då er det jamt bra over heile linja.
– I tillegg sit samabeidet mllom forsvaret og keeper. Andreas G. Sennesvik i mål fekk beskjed i pausen om berre stå og venta på skota. Då han gjorde det, så sleit dei med å skåra.
– Om vi skal trekka fram nokon, kven bør det vera?
– Eg synest alle gjer det bra, men det er kjekt å sjå at Trygve Lerch Dahl held roen gjennom heile kampen. Ungguten Nils Andris Hamre tar tak i forsvaret og viser dei andre korleis ein skal markera seg. Isak Røen held trøkket oppe i angrep og ankomstfasen, noko som gjev oss enkle mål. I tillegg var det kjekt å sjå at Jørgen Wold speler seg opp gjennom kampen etter ein litt trå start, avsluttar Husebø.
Nørrøna-Os 15-27 (9-11)
Utv: Norrøna 2x2 min, Os 2x2 min
Os sitt lag (mål i parentes): Andreas Sennesvik, Joakim Blostrupmoen (6), Trygve Lerch Dahl (2), Nils Andris Hamre (2), Fredrik Andresen (5), Isak Røen (6), Mats Berge Brunvatne, Peder Lyssand (1), Jørgen Engelsen, Håvard Bjørnør, Ove Lyssand, Sivert Egge Drange, Jørgen Wold (5).