Stang ut for Karoline

Bildeserie:

1 av 1

I helga fekk rallycrossførar Karoline Breivik testa ein ny bane, då rallycross junior cupen blei køyrd på Flisa.

– Det heile starta med fri trening slik at vi skulle bli kjend med banen. Dei innleiiande omgangen starta bra. Eg køyrde inn til 5. tid i 1. omgang og 4. tid i 2. omgang, fortel Karoline i ei melding til Midtsiden.

Med det låg ho på 3. plass etter to omganger.

Rakna i 3. runde

I tredjeomgangen rakna det diverre for ho.

– Eg hadde ein dårleg start, men køyrde meg opp i feltet og låg på ein andre plass. Då eg skulle inn i alternativsporet blei det ein kommunikasjonssvik mellom meg og spottaren min og vi gløymde alternativsporet. Dermed blei eg utelukka frå heatet og fekk straffepoeng som følgde meg resten av løpet, forklarar Karoline.

4. omgangen blei godt gjennomført, men straffepoenga gjorde at det ikkje blei noko finale.

– Hadde eg kunne stryke omgangen eg blei utelukka i, så hadde eg hatt andre spor i B-finalen og hatt moglegheiten til å køyre meg opp i A-finalen.

– No blei det ikkje slik og ei topp-plassering i juniorcupen er desverre utelukka i år. No får vi heller komma sterkare tilbake i neste runde, som er på Dokka 20.-21. august. Der stiller eg med Starleten, blanke ark og godt mot, avsluttar Karoline Breivik.

Køyrde landsfinale

Tidlegare i sommar har lillebror Kristian Breivik Gjøen køyrd det uoffisielle NM for bilcross, kor dei 120 beste juniorane kvalifiserte seg.

I innleiande omgangar køyrde han inn til 4, 5, 6 og 4. plass, noko som utgjorde 9. poeng. Han blei dermed nummer 83 av 127 deltakarar.

– Dette var ei ny bane for Kristian. Han hadde ikkje den bilen som var mest konkurransedyktig, men køyrde med den bilen han hadde. Berre det å vera blant dei 120 best er stort, og ein treng ikkje alltid den gromaste bilen for å nå langt. Dette var stort å vera med på. Berre det å konkurrere mot dei som stiller med biler med 200 hestekrefter og som satsar alt for å nå toppen var ei oppleving, fortel teamet rundt Kristian.