Starta akademi med Luis Figo - blir ungdomstrenar for Os

Os Fotball presenterer i dag Nuno Miguel Santos Marques som ny hovudtrenar for Os 2 og Os junior 1.

– Os Fotball skal vera i spissen innan spelarutvikling, og vi har stor tru på at Nuno vil vera med på å løfta satsinga vår på barne- og ungdomsfotball.

– Vi ønskjer Nuno velkomen til Noreg og Os, seier dagleg leiar og A-lagstrenar Endre Brenne.

Klare tankar og audmjuk haldning

Dialogen oppsto via NF Acadamy, som blant anna har hatt fotballskule på Nore Neset, og som har bistått Os i å finna ein ny trenar. Nuno har ikkje vore i Noreg før han no landa til ny jobb på Kuventræ.

– Vi har fått eit veldig godt inntrykk av han som person. Vi har forklart kva filosofi vi jobbar etter, og eg har inntrykk av at Nuna går til trenarjobben med både klare tankar og ei audmjuk haldning.

Nuno er frå Portugal og har brei erfaring som trenar og leiar, både innan talentutvikling og seniorfotball. Han har UEFA A-trenarutdanning gjennom det Portugisiske Fotballforbundet og har utdanning i Sport Coaching på Sport Science´s School of Rio Maior.

Johannessen er med vidare

– Eg vil takka Martin Røttingen Eidsvik, som har gjort ein god jobb dei siste åra, saman med John Ole Johannessen.

I 2018 blei det opprykk til 4. divisjon, i fjor landa dei på 9. plass av 12 lag i ny divisjon.

Eidsvik er opptatt i ny jobb i Nore Neset il, Johannessen blir med rundt laget, men byrjar i Nordsjøen, og er vekke i periodar.

– Det var godt å endeleg få landa ein ny hovudtrenar til Os 2 og junior 1. Nuno har ikkje berre god formell utdanning, han har brei og rik erfaring.

Med fartstid i FC Porto og Benfica

Den påtroppande trenaren har tidligare vore tilsett i utviklingsavdelingane til storklubbane FC Porto og Benfica, før han i 2014 fekk tilbod om å vera med å starta opp Gullballen-vinnar (2000) Luis Figo sitt fotballakademi i Kina.

I Kina har han òg jobba i eit fotballprosjekt i regi av Chelsea FC, og fleire lokale klubbar.