Startar aksjon mot bru
No blir det nytt møte om Aksdal-Bergen og traséval. – Tida er knapp og vi synes det er svakt av lokalpolitikarane å ikkje seia offentleg kva dei meiner om saka, seier Vibeke Harild.
Ungdomshuset i Øyane var overfylt torsdag 4. oktober, då Os Venstre hade invitert til folkemøte med informasjon og debatt om traséval mellom Stord og Bergen.
Les òg: Fusa fekk massiv støtte
– Det var eit veldig sakleg møte med mykje god innformasjon frå kompetente deltakarar, synes Vibeke Harild.
Harlid bur i Øyane og er blant dei mange som stilte spørsmål til panelet denne kvelden.
– Både folkemøtet og Midtsiden sitt intervju med fleire lokalpolitikarar gjer at mange sit igjen med tre hovudinntrykk:
1. Avgjerd om trasé kan koma veldig snart, allereie om få månadar.
2. Midtre trasé, altså bru frå Reksteren til Os, er mest aktuell.
3. Politikarane i Os har ikkje gjort seg opp ei meining.
– Det er tydeleg kva Søviknes vil, men skal han få snakka Os si sak når fleirtalet i Os kanskje meiner det motsette? Kva meiner Høgre og kvar er opposisjonen? Kor lenge skal dei venta med å meina noko i denne saka? spør Harild.
Ho seier ho har registrert fleire synspunkt på facebook, men saknar offentleg og ærleg uttale frå lokalpolitikarane.
– Det finnest mykje dokumentasjon og rapportar i denne saka, at fleire seier at dei førebels ikkje veit nok synes eg er skremmande.
– Dessutan handlar ikkje dette berre om detaljar og totaløkonomien til Vestlandet, det handlar om kva vi vil med Os, korleis Os skal sjå ut i framtida, om 50 år, om 100 år. Medan lokalpolitikarane sit og ventar blir viktige avgjerder fatta sentralt. Avgjerder som vil påverka Os i stor grad.
Startar i Øyane - held fram i Os
Nokre initiativtakarar i Øyane har invitert til møte i ungdomshuset komande tysdag på kveldstid.
– Dette blir ikkje eit informasjonsmøte eller debattpanel. Vi vil berre samla oss, og invitera andre som engasjerer seg i saka, for å diskutera stiftinga av ei aksjonsgruppe mot bru over Bjørnefjorden.
– Vi startar i Øyane, men dette er ei sak for heile Os, så vi vil følgja opp med fleire møter og plass til større folkemengder seinare. Og vi håper at vi kan få politikarane i Os til å sjå at ei bru vil gjera Os til ei gjennomfartsåre og at vi tar best vare på bygda med å styra trafikken unna den fantastiske skjergarden vår, seier Vibeke Harild.