Stel fangst frå teiner

Hobbyfiskar Odd Haldorsen fortel om tjuveri av fangst frå teiner, eit problem han har opplevd over tid.

– Det kunne vore interessant å veta kor stort omfanget er, seier Haldorsen, som håper lesarane som har opplevd det same om kommenterer saka, eller kontaktar politi eller media, og på den måten er med på å kartlegga problemet.

– Nokre gongar er det tydelegare enn andre, for eksempel når dei ikkje ein gong har lukka luka etter at dei har stole fangsten.

– Andre gongar er det berre mistenkeleg at alt agnet i teinene er vekke, men alle teinene er tomme for fangst - eller at dei er flytta.

Stel klør av krabbe og hummar

Haldorsen har opplevd tjuveri frå teinene sine både når han fiskar etter krabbe og no - etter at hummartida starta.

– I tillegg til å stela fangsten slenger dei berre teina frå seg, gjerne på djupare vatn, så du ikkje finn den igjen. Teina blir ståande på botnen og driva «spøkelsesfiske» i årevis, noko som ikkje er særleg miljøvenleg.

– Lågmålet er når dei stel klør frå fangsten og lar resten vera igjen. No sist fann eg ein levande hummar utan klør i teina. Den var i tillegg under minstemålet. Eg kasta den uti igjen og håper den klarer seg.

Å ta klørne, i staden for den kjøttfulle halen, seier kanskje sitt om kunnskapsnivået på mattjuvane.

Ikkje hindra av høg trafikk

Teinene som Haldorsen har hatt ubodne gjestar i, har vore sett i Strøneosen og i Tøkjesundet i Øyane.

– Dette er ganske trafikerte område, nokre av dei også synlege frå fleire bustadar, men det har dessverre ikkje hindra tjuvane frå å forsyna seg.

– Har du noko formeining om kven det er som driv og stel fangst?

– Nei. Eg håper og trur at det ikkje er andre fiskarar, dei veit jo sjølv kva det betyr av innsats å driva med hobbyfiske. Kanskje er det nokon som verken har kunnskap eller ork til å fiska sjølv, og som ikkje bryr seg så mykje om kva som er mitt og andre sitt.

– Eg bruket store, synlege blåser på teinene, mens eg ser fleire andre bruker små flòt, eller skjuler bruket sitt ved å fortøya det i land. Kanskje det har gjort mitt bruk meir utsett for tjuveri.

– Heldigvis har eg krabbe- og hummarhus rett nedanfor bustaden til ein slektning, så dette har fått ligga i fred.

• Midtsiden samleside: Jakt og fiske