Stenger Oshallen

Torsdag kveld blei det bestemt at Oshallen skal stengast fram til snøen på taket har blitt moka vekk.

Kjetil Vasby Bruarøytorsdag 25. feb. 2010 20:35

Grunna store snømengder på taket blir Oshallen stengt. Det bestemte styret i Osbadet, som driftar hallen, i møte torsdag kveld.

- Vi vil ikkje ta sjansar, derfor stenger vi hallen fram til taket har blitt rydda for snø, seier styreformann i Osbadet, Tor Inge Døsen.

- Men Osbadet er ope som vanleg, presiserar han.

- Er det oppdaga symptom på at det er for mykje snø på taket?

- Ja, vi ser enkelte stadar at taket er pressa litt ned, men snøen har førebels ikkje gjort noko skade.

Handballkampar i fare
Fredag blir det ingen aktivitet i Oshallen. Laurdag skal både handballherrane og damelaget etter planen ha heimekampar.

- Vi jobbar med å få tak i nok personar til at vi klarar å rydda taket i løpet av fredagen. Det er eit stort tak, men vi håpar å bli ferdig tidsnok til at handballen slepp å avlysa seniorkampane, seier Døsen.

Snøryddinga skal utførast delvis på dugnad av medlemmar i Os Turn.

- Tryggleik er viktigast, derfor må vi ha kompetente arbeidsleiarar på taket. I tillegg kan det bli ei utfordring å få tak i nok sikringsutstyr.