Stengt for publikum ei veke til

Lensmannskontora i Bjørnafjorden og Austevoll har grunna smitteverntiltak mot koronaviruset stengt for publikum.

– Dette held fram i første omgang ut veke 17, opplyser lensmann Oddbjørn Dyrdal.

– Det er likevel mogleg å møta oss fysisk, men det må først avtalast på epost eller telefon (56303900) i opningstida.

Bjørnafjorden lensmannskontor har folk på kontoret kvar dag, men det er altså ikkje mogleg å berre stikka innom med det du har å melda.

– Vi har eit lite resepsjonsområde. Om vi hadde ope som normalt kunne vi risikert at to familiar kom innom samtidig, og det å ha 8-10 personar innom på same tid ville utsett fleire av oss for smitterisiko.

Skal du melda ei sak kan du gjera dette på politiet.no. Ved nød ringer du 112.

Nøgd med innbyggarane

– Korleis er situasjonen elles for Bjørnafjorden lensmannskontor?

– Den er god. Vi har alt mannskap tilgjengeleg, og deler oss mellom kontor og heimekontor.

– Samtidig ser den ut til å vera god ute i felten. Eg må seia at eg er veldig nøgd med korleis innbyggarane våre oppfører seg i desse koronatider!

Dei få tilfella som har handla om feststøy har vore «ordinær» støy, ikkje upassande store samlingar av folk.

– Vi håper tilstanden òg er god ute i «de tusen hjem», og at folk ikkje nøler med å ta kontakt om det er noko som ikkje er greit.

Pass frå neste år

Bestilling av pass er for tida uansett ikkje eit tema, både fordi dei færraste i desse dagar reiser utanlands, og fordi Bjørnafjorden lensmannskontor midlertidig ikkje tar imot bestilling av pass.

Dette gjeld frå 1. februar i år til dei er på plass på ny stasjon på Moberg.

– Her skal bygginga vera i rute, så det går mot innflytting i slutten av januar neste år, seier Dyrdal.