Sterk bortekamp

Fotballdamene til Os var i storform mot gode NBK, og fekk løn i form av sesongens første poeng.

Kjetil Vasby Bruarøytorsdag 28. mai 2009 10:06

Damelaget gjekk på tre eittmålstap i dei tre første kampane, men sundag løsna det, på bortebane mot NBK/Eikanger/Kvernbit.

- Motstandaren ligg på øvre halvdel av tabellen, så det blei ein tøff og jamn kamp, seier trenar Terje Erstad.

Mindre krevjande blei det ikkje av at heimelaget, i ein god periode for Os, tok leiinga på ein overgang.

- Det er vanskeleg å få jentene til å tru på siger etter tre tap, og det var tungt å få denne skåringa imot mellom fleire gode Os-sjansar.

Men femten minutt før slutt blei det frispark til gjestane, like utanfor 16-meteren. Mariann Solibakke, som tar alle frisparka for Os, sette inn eit praktskot like under tverrliggaren. Keeper var på ballen, men klarte ikkje å hindra Os i å utlikna.

- Det siste kvarteret av kampen blei hektisk, så det var deilig då dommaren blåste av. No fekk jentene vist at dei kan, også mot gode lag, takka vera enorm innsats, seier Erstad.

Os sitt lag: Jeanette Kallekleiv, Karina Lund Rød, Helene Steffensen, Helene Nøss, Heidi Kloven, Malin Moldskred, Tale Ivarhus, Mariann Solibakke, Anne Øvreeide, Caroline Nielsen og Linda Johansen.
Også innbytarane Charlotte Balland, Monica Nordeide og Malin Heggland fekk speletid.

Dei to neste kampane er begge på heimebane, 1. og 7. juni, begge klokka 19.00. Første gjest er serieleiar Follese, som rykte ned frå 2. divisjon i fjor. Neste er Hald, som ligg tre plassar over Os på tabellen.

SJÅ TABELL