Stoppa øltjuv
Han ville ha i pose og sekk, men fekk ingenting gratis, mannen som prøvde seg på Rema 1000 onsdag kveld.
Ein mann i midten av 20-åra blei onsdag kveld tatt på fersken då han prøvde å stela øl på Rema 1000 Kuvenstasjon.
- Vi fekk melding klokka 18.05 og rykte ut og tok mistenkte med oss, seier operasjonsleiar Bjarne Flokenes i Hordaland politidistrikt.
Ifølgje vitne Midtsiden.no har snakka med, fylte mannen ein ryggsekk og ein pose med øl før han gjekk til kassen for å betala for ei vare som kosta langt mindre enn drikkevarene.
Då tilsette spurte kva han hadde i sekken påstod han at han hadde kjøpt ølet i ein annan butikk. Han blei ikkje trudd.
- Han sa at butikken ikkje hadde den typen øl han hadde i sekken, men det var snakk om 3-4 sekspakningar med vanleg Hansa-øl. Dessutan hadde andre kundar sett at han fylte sekken medan han var i butikken, fortel vitnet.
Han skal dessutan vera utestengt frå butikken grunna tidlegare forsøk på å stela.
Mistenkte blei dimittert etter avhøyr.