Storkamp av Os
Fredrik Heggland skåra sitt første for A-laget, Preben Borgen hadde både skåring og to assist, Os leikte seg mot Stavanger på Kuventræ i dag.
Bildeserie:
Vi hadde tenkt å skriva at Os var nærmare 6-0 enn Stavanger var 4-1, men eit uhell i Os-forsvaret i 89. minutt gav gjestane eit mål å trøysta seg med på veg sørover etter dagens kamp på Kuventræ.
Os - Stavanger 4-1 (2-0)
Målskårarar, Os: Christer Olsen, Fredrik Heggland, Preben Borgen og Ramo Racic.
Sjå 3 av Os sine 4 skåringar, fleire sjansar og Tim Henrik Sperrevik oppsummera kampen i videoen nedanfor.
Os fekk til det meste i dag, høgt tempo på ball, stor sjanseproduksjon og god defensiv kontroll.
6. min: 1-0. Frispark frå rett utanfor 16-meteren. Preben Borgen skyt mot lengste hjørne, keeper reddar, men gjev retur og der kjem Christer Olsen og legg ballen rett under keeper inntil stanga.
7. min: 2-0. Os vinn ballen på si høgre side og sender den raskt og hardt over til Vegard Engelsen Moberg på venstresida. Vegard rekk ballen, legg den vidare til Erik Kanestrøm som prøver å skåra. Keeper gjev retur og der kjem unge Fredrik Heggland, som spelte ein veldig god kamp i dag, og set inn sitt første for A-laget til Os.
58. min: 3-0 på straffe. Os har spelet, initiativet og sjansane, men har både i siste halvdel av førsteomgang og i starten av 2. omgang gjort nokre feile val og avslutta litt tamt. Men så kom Torkel seg åleine mot keeper og blir felt. Preben Borgen lokkar keeper til venstre og legg ballen klin inntil høgre stolpe. Preben feira elegant med dans.
83. min: 4-0. Preben åleine skrått mot mål. Kan fint avslutta sjølv, men Ramo Racic kjem på motsett side og insisterer på å få ballen. Preben legg den høfleg i lufta og Ramo headar inn 4-0.
89. min: 4-1. Os har full kontroll og Os sin stødige kaptein Stian Lunde har god tid på seg med ballen i forsvaret. Men så venta han eit sekund for lenge med å senda den og får eit uheldig brot. Lunde spring inn igjen motspelaren, men klarer ikkje å hindra han i å legga inn.
Ein god dag på heimebane: Publikum, trenarar og spelarar gjekk nøgd frå Kuventræ i dag etter ein kamp der ikkje berre spelet fungerte, men innsatsen var svært høg gjennom heile kampen hos alle 11. Fredrik Heggland, Simen Lassen, Vegard Engelsen Moberg har ekstra god grunn til å vera nøgd i dag, saman med banens beste; Preben Borgen.
Os: Anders Kloven - Torkel Hjertnes (John Ole Johannessen), Per Søgnen Merai, Stian Lunde, Vegard Engelsen Moberg - Erik Kanestrøm, Tore Valvik, Simen Lassen (Håkon Kvittingen), Fredrik Heggland - Preben Borgen - Christer Olsen (Ramo Racic).
Onsdag ventar 2. divisjonsmotstand på Kuventræ, klokka 18 speler Os mot Åsane og osing Vegard Leikvoll Moberg i første NM-runde.
VIDEO: 3 av Os sine mål, fleire sjansar og intervju med trenar Tim Henrik Sperrevik (3.37) (Foto: Andris Hamre)