Storslagen feiring av dei lokale eldsjelene

Bildeserie:

1 av 22

Leia av ein ytst solid Eirik Søfteland, fekk 750 tilhøyrarar 2 timar med glede, takksemd og musikk.

Det heile vart sparka i gang av bergensartisten Halie.

No 18 år, men allereie har ho vore å sjå på Skavland, Lindmo og på dei fleste musikkfestivalane i Noreg.

Imponerande arrangement

Eirik Søfteland er vi van med å sjå i ulike roller, men som konferansier har han verkeleg funne ei ny rolle å imponera i.

Å skulla ha kontroll på regi, manuskort, kven står kvar, kven han intervjuar, svitsja til artist midtvegs, og levera ei Queen-tolking det vil gå gjetord om i mange år, er om ikkje anna strålande levert!

Det heile var pakka inn i ei visuelt imponerande lyd- og lyspakke.

Det vart ikkje tangering av publikumsrekorden frå 2011, men Andreas Lindborg frå Bergen Live, som står for gjennomføringa av Hjartebank-arrangementa til Sparebanken Vest, fortel at gårsdagens arrangement i Oseana er eit av dei beste dei har hatt.

– Her var det fantastisk stemning frå start til slutt, synest Lindborg.

Ektefølt takksemd

Dei 11 prismottakarane hadde like ulike formål som reaksjonar på at nettopp deira søknad hadde gått gjennom juryen.

Her var det dei som felte tårer, dei mållause og dei som kanskje ikkje fekk sova natt til fredag.

At dei tilsette i regionskontora til Sparebanken Vest såg like glade ut for å kunna gje vekk ein million kroner, auka berre opplevinga.

I tillegg til Halie og Eirik Søfteland spelte det som må vera Fusa sin mest sjarmerande duo; Zofia og Frida.

– Dette er ikkje ein mini-gitar, det er ein ukulele, kom det scenevant frå Zofia mellom ein av låtane.

Kvelden vart avslutta med Kari Bremnes, og skal ein bruka applausen frå publikum som mentometer, var dette ei perfekt avslutting på ein storslagen kveld.