Strålande cupstart
Med ny bane, ny tribune og flunkande nytt lydanlegg kunne Os Turn Fotball ta imot 1300 gjestar til cup i strålande sol.
Bildeserie:
Bjørnefjorden Cup er med over 1100 fotballspelarar på mellom 6 og 12 år og fleire hundre trenarar og tilskodarar det største idrettsarrangementet i Os.
- Vi har stort sett vore heldige med vêret denne første helga i juni. Eit år la vi cupen til St. Hans-helga, men det fekk vi svi for i form av ei svært lokal, men tung og lang regnbyge, seier formann i fotballgruppa Leif Gunnar Borgen.
På langtidsvarselet såg det ikkje så trygt ut tidlegare i veka, men laurdagen var det strålande sol og ikkje for varmt, og sundag ser ut til å bli like bra.
Deltakartalet er høgt, men med 15 lag færre enn dei 130 som var i rekordåret 2008. Nytt i år er sjølvsagt den nye kunstgrasbanen, tribunen og garasjen, som dei har brukt som ein av kioskane. Nye toalettfasilitetar er også på plass.
Banen hadde offisiell opning ved gåvegjevar Trond Mohn, med samling på Osbadet i etterkant. Dette kjem vi tilbake i i eigen artikkel.
På den ledige plassen i enden av banane har arrangørane rigga opp ein leikepark med fleire hoppeslott og andre oppblåsbare leikeapparat. Nokre er gratis å bruka, andre er med å gje inntekt til klubben.
Før helga har også eit nytt lydanlegg kome opp, festa til lyktestolpane mellom kunsgras- og grasbane. Dette kjem vi nok til å ha glede av også på A-lagskampane framover.
Midtsiden.no kjem med fleire bilde frå arrangementet etter helga.