Strålande inngang på sporty vinterhelg

Godvêrsperioden som starta julaftan, og nesten berre har vore avbrote av nokre snøbyger, nærmar seg slutten.

Men det er nokre dagar igjen, og dei kan bli ekstra fine.

Fredag er det skyfri himmel, 3 minus og svak vind i Os.

Laurdag, som tidlegare var meldt overskya, får òg sol, kulde og svak vind.

Duka for vintersport

Brannvesenet har vore og målt isen på fem vatn i dag. På dei to første var det farbar is, 15 til 20 cm på Lekvenvatnet og 19 cm på sørleg del av Ulvenvatnet.

Vi kjem tilbake med endeleg resultat, men det ser ut som om du kan henta fram skøytene - om du finn blank nok is å skøyta på.

Laurdag er det dessutan skirenn hos Bjørnefjorden Golfklubb.

I Eikedalen var det sesongopning i helga, frå i dag er òg tvillingtrekket ope. Dei har ope både på dagtid og kveldstid fredag, og på dagtid i helga.

Varme i vente

Laurdag ettermiddagen skal det skya til, og søndag er det meldt snø og 1-2 plussgradar.

Det er meldt nedbør frå søndag til og med onsdag, og frå måndag skal temperaturen auka til 4-6 varmegradar.

Ifølgje langtidsvarselet kan det bli både sol og snøbyger nærmare neste helg, men i første omgang ser det ut som om mykje av vinteren skal vaskast vekk for denne gong.

• Sjå detaljert vêrmelding for Osøyro på VG Pent.