Strategi for ungdomsbustadar?

Kommunen rullerte i fjor den bustadsosial handlingsplanen, men den omfattar i liten grad førstegongsetablerarar som skal inn på ein tøff bustadmarknad.

- Ei av dei største utfordringane ved å vera ung er å skaffa seg tak over hovudet.

- Eg trur vi kan venta oss enda høgre bustadpriser i Os når nye-vegen står ferdig. Har vi som kommune ein aktiv strategi på dette området, lurte Lars Atle Skorpen på under politisk kvarter i formannskapet tysdag.

Både kommunalsjef Nils-Petter Borge og ordførar Terje Søviknes (Frp) viste til den bustadsosiale handlingsplanen som einaste strategien på området.

- Vi har merka ei aukande interesse frå utbyggjarar i høve til utleigebustader, la Borge til.

- No blei fristelsen for stor. Vi hadde jo ei prosjekt på Kuventræ på gang saman med ein utbyggjar som ville gje 50 bustader til ungdom, men der har jo fylkesmannen kome inn i bilde både i høve til arealplan og areal til gravplass, fortalde Søviknes.

Kan gi nye klasseskille

Skorpen tenkte ikkje først og fremst på utleigebustader, men små og billegare husvære som ungdom kunne ha råd til å kjøpa.

- Eg er redd for at vi kan få eit nytt klasseskille mellom dei med foreldre som har råd til å hjelpa og dei som ikkje har det.

- Kommunen har vel utbetalt omlag 67 millionar i startlån i fjor som ei hjelp, men eg trur det er like viktig at de med kanalar inn i regjeringskontora tek opp dei nye krava om eigenkapital.

- Eg forstår at ein ikkje ønskjer å gjera ungdom til gjeldsslaver, men å kreva høgre eigenkapital er kanskje ikkje vegen å løysa problemet, meinte Søviknes med oppfordring til arbeiderpartiet sine representantar.

Han fekk støtte frå rådmannen som var uroa for om staten no er i ferd med å skyva problema over på kommunane for at dei skal finna løysingar.

- Det kan ikkje bli slik at kommuner med allereie knappe rammer skal løysa dette òg, slo rådmann Knut Terje Rekve fast.

Vilje hos utbyggjerane

Både i Halhjemsmarka gjennom Byggconsept sitt prosjekt og i Kuvågen gjennom Skanska/Ikea sitt BoKlok-prosjekt er det bustader under oppføring som rettar seg mot målgruppa Skorpen var oppteken av.

- Eg trur det er interesse frå utbyggjarar å bygge for førstegongsetablerarar slik at dei får seg eit rom og ein kjæreste.

- Om det ikkje blir for store leiligheiter og ein kvaderatmeterpris ned mot 25 000 trur eg det er vegen å gå, slo Espen Aspenes (Frp) fast.

- Dette er noko både vi som politikarar og administrasjonen bør kunne diskutera med utbyggjerane.

Lagar ein kort strategi

Kommunaldirektør Karl Ole Midtbø peika på at kommunen det siste året hadde hatt godt kontakt med utbyggjarane.

- Det har vore fleire som har vore i kontakt med oss for å høyre om kva behov som er i kommunen og våre tankar omkring denne problemstillinga.

- Om vi kan samla det som no har vore sagt rundt bordet i eit to-siders strateginotat så hadde det vore greit å ha som grunnlag for den vidare kontakten med utbyggjarar både for oss som politikarar og for administrasjonen, oppsummerte ein nøgd Skorpen.