Streiker frå onsdag
Fagforbundet tek ut fire medlemmar på den private delen av Luranetunet. - Streiken skal ikkje få medisinske konsekvensar, lover Hege Bjørnør.
Fagforbundet og NHO Service kom ikkje i mål med tarifforhandlingane for dei private, kommersielle sjukeheimane noko som resulterte i streik ved sju sjukeheimar på austlandet frå førre veke.
- Frå onsdag trappast streiken opp. Då blir fire av medlemmane våre tilset ved Aleris omsorg på Luranetunet teke ut, fortel leiar i fagforbundet i Os, Hege Bjørnør.
Ting kan ta lengre tid
Dei fire er hjelpepleiarar eller assistenter i den privatdrevne delen av Luranetunet.
- Dei fire jobbar på kvar sine avdelingar, så konsekvensane for pasientane blir ikkje dei heilt store.
- Eindel ting som klesvask og oppvask vil nok ta lengre tid, men vi er opptekne av at det ikkje skal gå utover pleie, stell og det medisinske, forsikrar Bjørnør som veit at om streiken får konsekvensar for liv og helse så vil regjeringa fort koma med tvungen lønsnemnd.
Sjukelønsordninga det viktigste
Det er fleire delar av tariffavtalen partane ikkje er samde om.
- Det handlar om løn, pensjon og sjukelønsordninga.
- Dei private kommersielle sjukeheimane forskutterar berre tre månader sjukeløn, medan offentlege sjukeheimar forskutterar 12 månader.
- Dette har mykje å seie for medlemmane våre om dei blir langtidssjukemelde. Etter tre månader vil dei gå frå å få sjukepengane utbetalt av arbeidsgjevar til å skulle få dei frå NAV. Av erfaring veit vi at det som ofte skjer då er at dei får eit opphald i utbetalingane grunna sakshandsaming og at dei blir ståande utan penger til mat og faste utgifter i ei periode, forklarar Bjørnør.
Ingen bevegelse
Det var i samband med tarifforhandlingane i 2010 partane fekk utvida sjukelønsordninga frå dei 16 dagane som er arbeidsgivarperioda til dagens tre månader.
- Når vi no krev det same som i offentleg sektor, nemleg 12 månaders forskuttering, var ikkje motparten særleg villig til det og forhandlingane gjekk i stå, seier Bjørnør som sjølv var med på meklinga med NHO Service.
Etter at fagforbundet tok ut 64 medlemmar ved sju sjukeheimar i Oslo og Asker onsdag i førre veke har det ikkje vore kontakt mellom partane.
- Eg reknar med at streiken blir trappa opp som planlagt frå onsdag, avsluttar Hege Bjørnør som måndag kveld skal i møte med medlemmane sine for å orientere om streiken.