Lokal | 28. des. 2009

- Stygg kjøring

Brøytebilane i Os har vore i sving 9 av dei 10 siste dagane. Bilistane i bygda gjer ikkje jobben lettare.

- Stygg kjøring
Kjetil Vasby Bruarøy
Kjetil Vasby Bruarøymåndag 28. des. 2009 14:32

Bildeserie:

1 av 3

- At ikkje det oftare går gale er noko eg tenker på kvar vinter, seier Norvald Øvreeide frå Valde Tranport AS.

Selskapet har ansvar for brøytinga på Byvegen. Helga før jul gjekk det også gale for Øvreeide.

- Ein bil som kom imot på Kalandseidet skar over og hamna rett i skjeret mitt, og sklei vidare rett i bilen bak. Hadde det ikkje vore for at han kjørte ein nyare Volvo ville det nok gått mykje verre med sjåføren, trur Norvald.

- Mykje stygg kjøring
På veg frå Flåten til Os sundag kveld låg Midtsiden.no bak ein brøytebil frå Valde Transport. Då brøytebilen svingte innom busslommene på veg sørover prøvde bilen bak å kjøra forbi. Han fekk nesten brøytebilen i sida.

- Gult blinkande lys betyr "fare". Det er det dessverre ikkje alle som forstår. Møtande trafikk som undervurderer breidda vår og andre som prøver å kjøra forbi skapar kvar dag farlege situasjonar, seier Øvreeide.

- Dei som ligg tett bak brøytebilen får dessutan saltet rett i grillen, salt som helst skal på vegen, legg han til.

- Gjer så godt vi kan
Robert Kaastad, som har ansvar for brøytinga frå Ulvekrysset og sørvest mot Lepsøy, Strøno og Lysefjorden, kan fortelja om tilsvarande kjøring hos dei brøytebilane hans treff på.

- I tillegg må vi finna oss i mykje klaging. Vi gjer så godt vi kan, og har hatt bilane i meir eller mindre kontinuerlig drift sidan snøen kom 18. desember.

- Mange er dårleg skodd, og lite førebudd på vinterføre. Dei ventar at vegane skal vera svarte i heile bygda, men vi kan ikkje ha ein brøytebil gåande i kvar sving.

Ekstra ressursar er sett inn
Valde Transport AS og Robert Kaastad AS er blant dei som er underleverandørar til NCC, som har kontrakt med tatens vegvesen på brøyting av europaveg og fylkesvegar i Os og bergensområdet.

- Eg har jobba med dette i mange år, og kan ikkje hugsa at vi har hatt liknande behov for brøyting sidan 1986, seier prosjektleiar Eivind Hope.

- Blant klagane vi får går det meste ut på at publikum ventar at vi set inn meir ressursar. Vi set inn alt vi har, i Os har vi 8-10 einingar, i tillegg kjem brøyting av kommunale og private vegar.

Kvar dag utanom 1. juledag har bilane i Os vore i sving, cirka 1800 timar har gått med til salting, brøyting og rydding.

Best i Os
Hope seier han forstår at enkelte bilistar er fortvila.

- Det er nok fordi dette er uvant for mange av oss. Heldigvis får vi også nokre konstruktive tilbakemeldingar, og av og til får vi også skryt.

Valde Transport fekk førre vinter tilbakemelding frå oppdragsgjevar Statens vegvesen at Osvegen/Byvegen var den som var best brøyta i Hordaland.

- Vi fekk også blomar frå busselskap, og vi har fått ros av trailersjåførar, som anten på veg nord eller sør seier vegen i Os er godt rydda sesongen sett under eitt. Slikt er kjekt å høyra, seier Norvald.

Salt, snø og parkering
Blant det NCC får spørsmål og kommentar til, er salting før snøen kjem.

- Dei lurer på om ikkje det er betre at snøen får legga seg og frysa fast. Men på hovudvegane liker vi å salta først, slik at vi har håp om å få alt vekk. Let vi snøen festa seg så blir det klink is når mildveret kjem, forklarar Hope.

Dei største utfordringane brøytemannskapet har er uansett fortau, gangveg og parkeringsplassar.

- Mange plassar står det bilar parkert på fortau eller veg, rett og slett fordi det ikkje er nok parkeringsplassar der dei bur. Då risikerer dei å bli brøyta inne, eller i verste fall, sperra for all brøyting av vegen innanfor. Brøytebilane er breiare enn mange trur, seier Eivind Hope frå NCC.

Under bilda kan du sjå ein filmsnutt tatt sundag kveld. Personbilen gjorde eit mislykka forsøk på å koma seg forbi brøytebilen rett før filminga starta, men heldt fram med å ligga tett bak lastebilen i håp om å koma seg forbi.

Spennande? Vil du ha ukas høgdepunkt i innboksen?

Les meir om

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.