Suksess med dinosaurar

"Var dette ei god løysing" kan du høyra ungane i Hegglandsdalen Barnehage seia til kvarandre.

I løpet av dei to siste åra i barnehagen er alle ungane innom Dinosaurskolen i Smågrupper, eit amerikansk program forma for klinisk bruk, men som Hegglandsdalen barnehage har valt å bruke som eit førebyggande tiltak.

– Vi fekk tilbod om opplegget etter at vi hadde fullført skule-bhgprogrammet "De utrolige årene" saman med andre barnehagar i Os. Vi er einaste barnehage i Noreg som har tilbodet dinosaurskule i smågrupper, men nokre barnehagar og skular driv eit tilpassa opplegg i store grupper seier Gry Enoksen og Renate Sande Bjørø.

Dei er begge pedagogiske leiarar ved Hegglandsdalen Barnehage, to av tre tilsette som held på å sertifisera seg som Dinosaurskole-instruktør.

– Dinosaurskolen handlar om sunn fornuft sett i system, den passar for alle og er eit veldig godt verktøy. Programmet er spesielt utvikla for ungar som er litt urolege eller som er litt lite utadvendte, og treng trening i sosial kompetanse og sinnemeistring.

Film, rollespel og leik

Dinosaurskolen i smågrupper blir kjørt med ei gruppe på seks ungar frå 4 til 5 år, to intense timar éin gong i veka, saman med to vaksne.

– Vi har eit eige rom for Dinosaurskolen og her har vi filmframvising, teater, rollespel, leik, samtalar og aktivitetar.

– Kvar gruppe held på i eit halvt år før vi tar inn ny gruppe, forklarar Gry og Renate.

Korleis overleva?

Som del av skulen, både på film, teater og i rollespel, er det fleire figurar. "Dina dinosaur" er rektor på skulen, og ho har overlevd i mange år takka vera god åtferd.

Så har vi Baby-Dina og skjelpadda, og ungane Mari-Manerer og Willy Problemløysar. Willy er litt vill og Mari er mønsterelev. Ungane identifiserer seg med Willy og kjem med idear om korleis dei kan løysa problema hans.

- Vi rollespelar ungane sine utspel og på denne måten får barna inn erfaring ved å utføre dette i praksis.

– Det handlar om å styrka sosiale eigenskapar, å handla rett ut frå ulike situasjonar. Det er for eksempel ikkje ulovleg å vera sint, men det er lurt å læra å gjera det rette også når du er sint.

– Og blir du litt for sint så kan du gjera som skjelpadda, gå inn i skalet. Vi høyrer innimellom ungar bruka uttrykka også utanfor gruppa, at dei for eksempel spør kvarandre om dei har valt rett løysing eller i ei sint stund ber om fred fordi dei er "inni skalet".

– Fungerer også på menn

Parallelt med gruppene i barnehagen les foreldra om kva ungane lærer i barnehagen, så dei får følgja med på opplegget og kjenne til metodane.

– Vi får veldig gode tilbakemeldingar og fleire foreldre fortel om god effekt og at dei sjølv har nytte av enkelte element elles i oppdraginga.

– Å førebygga uønskt åtferd, blant anna ved betre kommunikasjon, er kanskje også noko vaksne kan ha bruk for å kursast i.

– Ja, Dinosaurskolen fungerer faktisk veldig fint på menn, ler Gry og Renathe.

– Dette er eit godt prosjekt som vi trur fleire kunne hatt nytte av. Enkelte stadar, som i Fjell, har kommunen eigne tilsette som reiser rundt frå skule til skule og barnehage til barnehage, og held desse gruppene.

Les meir/ekstern lenkje: deutroligearene.uit.no