Suverene i kvalikken
Handballjentene til Os var suverene då dei kvalifiserte seg til den nasjonale Bringserien med 44 plussmål.
16-årsjentene til Os Turn Handball spelte i helga kvalifisering til den nasjonale Bringserien i Kristiansand.
- Samtlige av jentene var bunnsolide, skryt trenar Kenneth Husebø.
Gav full gass
Første kamp gjekk tidleg laurdag ettermiddag mot Rælingen frå Oslo-området.
- Vi satte alle klutar til for å få opp tenninga og få jentene 100% klare til kamp.
- Dei responderte til fulle og gav aldri Rælingen sjans til å henge seg på, fortel Husebø om kampen Osjentene vann 38-15.
- Det var viktig å få ein god start og best mogleg målforskjell. Jentene skal ha skryt for å halde konsentrasjonen og dampen oppe i to ganger 25 minutt.
Eit lurveleven
Laurdagens andre kamp gjekk mot arrangørklubben Våg som hadde mobilisert også på tribuna med kubjeller og masse støy.
- Det blei eit lurveleven og Våg hadde nok trudd dei skulle gje oss kamp, men jentene ville det annerleis.
Os festa grepet tidleg i første omgang og avgjer i realiteten kampen allereie då.
- 2. omgangen blir ei transportetappe kor eg nyttar spelarar på litt uvante plassar. Vi gjer det vi må for å vinna, forklarar Husebø om 25-14 sigeren.
Bra botnnivå
Siste kamp gjekk sundag morgon mot Birkebeineren frå Drammensområdet.
- Vi leiar berre 12-10 til pause etter å ha vore oppe i 4-5 måls leiing tidlegare i omgangen.
- Eg må gje nokre klare meldingar i pausen om at slik kan vi ikkje ha det. Igjen responderar jentene godt og hever seg slik at vi vinn med 10, seier trenaren om 27-17 sigeren.
Sjølv om han ikkje er like nøgd med alt meiner han botnnivået til laget låg såpass høgt i helga at sigrane aldri var truga.
Heldt leikestove
Sjølv om samtlige spelarar leverar solide prestasjonar trekk Husebø likevel fram tre spelarar.
- Ann Kristin Lyssand leverer solid i mål og presterer langt over det eg har sett ho gjera tidlegare.
- Julianne Hjelle held leikestove med motstandarane når ho har lyst og finn det for godt.
- Ho har eit finteregister ut av ei anna verd og finta same jente tre gonger på ræv på rad, smiler Husebø.
Den siste Husebø trekk fram er midtback Vilde Brattabø.
- Vilde er sjef og styrar både i forsvar og angrep. Sjølv om ho ikkje er toppskårar gjer ho dei andre gode med smarte pasningar og oppspel, avsluttar Husebø.