Svaneangrep førte til slåsting

Etter stengetid på utestadane i Os fekk politiet melding om slåskamp i Hamnevegen.

Eit vitne til hendinga fortel om ein person som skal ha tatt kvelertak på ei av dei vaksne svanene som held til i Oselvo.

- Svanene var på graset utanfor Irisgården saman med ungane sine då ein person tok kvelertak på den eine svana og spaserte fleire meter medan svana hende etter halsen.

- Svana kasta etter pusten då mannen sleppte taket, fortel eit rysta vitne.

To arrestert

Innehavar på Solsiden, Tore André Sagstad, seier hans tilsette blei kontakta då det blei bråk på graset vis a vis utestaden.

- Det var etter stengetid, men våre tilsette blei kontakta for å hjelpa til.

Litt seinare stoppa politiet slåstkamp utanfor Esso-stasjonen. To personar blei tatt med til overnatting i arresten i Bergen. Ein av dei blei tatt med tåregass.

- Slåstkampen skal ha starta på grunn av åtaket på svanefamilien, men vi veit ikkje endå om dei to som er arrestert var saman eller er motstridande partar, fortel politibetjent Erlend Vollset ved Os lensmannskontor.

- Dei er sendt til avhøyr så vi veit meir om hendinga etter det.

Vollset oppfordrar alle til å la svanene vera i fred.

Stoppa moped

Tidlegare på laurdagen stoppa politiet ein moped i Idrettsvegen.

- Mopedføraren hadde med seg ein passasjer og han hadde ikkje på seg hjelm.

Det gjorde at politet skreiv ut eit forelegg.

Det har òg blitt meldt om feststøy fleire stadar i Os laurdag.

- Men det roa seg kvar gong då politiet kom på staden, avsluttar Vollset