Syden-rush

Bildeserie:

1 av 2

Travelnet Os Reisebyrå fekk ein treg start på årets sal av charterturar til Syden.

- Ein del hadde nok bestilt allereie i fjor, men då eg byrja å jobba her i vinter var det ganske roleg. Men så kom mai og juni, og då tok det seg opp igjen, seier Astrid Heggland.

Lågare tempo blei det ikkje det vêrmeldinga ikkje spådde anna enn regn frå første halvdel av juli.

Dyrt å vera sein
Dei som trudde det kunne vera lønsamt å stilla opp reiseklar for å kjøpa restplass har denne sommaren tatt feil.

- Slik er det ikkje alltid, og i alle fall ikkje i årets fellesferie. Det har vore stor trafikk med folk som vil til Syden frå midten av juli til første veka i august. Men dei få turane som har vore igjen har ikkje blitt selt på billigsal.

Derfor er det heller ikkje alle som var svoltne på sol som faktisk fekk seg ei reise.

- No er bestillingane til haustferien godt i gang. Mange føler dei ikkje har fått så mykje ut av sommarferien, og vil sikra seg noko å sjå fram til. Men salet går for fullt, så også her kan det vera lønsamt å vera tidleg ute.

Fann andre vegar til varmen
Då det var lite å velja i innan charterturar i sommar, fann Os Reisebyrå andre reiseruter sørover.

- Men rutefly til for eksempel Nice eller Barcelona er det fleire som har fått badeferie kombinert med storbyopplevingar, og fått meir ut av sommarferien utan vanleg chartertur, fortel Astrid.

Cruise, Kroatia og ein god nabo
Nye reisemål blir ofte godt mottatt, og dei siste åra har Kroatia blitt stadig meir populær. No kjem truleg også nabolandet Montenegro for fullt.

- Vi har hatt ein del som har vore på individuelle reiser til Montenegro, og som har kome med svært fine tilbakemeldingar. Dette blir nok i aukande grad eit populært reisemål blant nordmenn, trur Heggland.

Cruise, særleg i Middelhavet, har blitt eit attraktivt alternativ til charterturar til Syden, ikkje minst blant familiar med ungar.

- Om bord er alt inkludert, og cruisa har veldig gode prisar for å ta med ungar. Aktivitetstilbodet er også godt tilpassa småbarnsfamiliar. På 4 eller 7 dagar rekk du dessutan å sjå litt innimellom cruiselivet om bord.

Meir innanlands
Trenden i år har også vore at fleire ferierer i heimlandet. Hos Os Reisebyrå har turar med Hurtigruten auka mykje.

- For det meste er det vaksne par som tar turen til Kirkenes og heim igjen. Familiar tar gjerne Hurtigruten eit kortare stykke, for å besøka venar eller som del av ein ferie, der dei for eksempel kjører til Trondheim og tar Hurtigruten heim igjen.

Litt influensafrykt
Etter at folk via avisene blei åtvara mot å reisa til land som Spania og Hellas grunna fare for å bli smitta av svineinfluensa, har mange ringt reisebyrået.

- Folk, gjerne dei med babyar, har ringt for å spørja kva vi anbefalar. Vi har bedt dei ta kontakt med lege og eventuelt med forsikringsbyrået, for å høyra om dei får ei eventuell avbestillinga dekka. Til no er det ingen som har avbestilt, fortel Astrid Heggland frå Travelnet Os Reisebyrå.