Takk for innsatsen!
Kven vart siste vinnar i Midtsiden sine påskenøtter?
I årets påske tok vi fram igjen ein idé vi brukte i julekalenderen vår for elleve år sidan, men no med nye bilde tatt ulike stadar i Os.
#mellomfjordarogfjell; to bilde per dag, i fjell og skog, og ved sjø eller ferskvatn.
Vi publiserte nye bilde kvar dag frå skjærtorsdag til andre påskedag, og det har vore bra respons på alle dei fem ulike oppgåvene - trass nokre litt vanskelege oppgåver.
Moldegaard var vrien
I alt har vi fått rundt 50 korrekte svar på dei ulike oppgåvene. Fleire har sendt svar på alle oppgåvene, og dei fleste har svart rett på begge bilda.
Éi av påskenøttene viste seg å vera noko hardare enn dei andre; søndagens oppgåve, kor vi hadde kombinert eit bilde frå østersanlegget på Innerøya med eit bilde frå parken på Moldegaard, resulterte i færre riktige og fleire feile svar enn dei andre.
Dei som svarte feil på Moldegaard var uansett ikkje langt unna med sine svar - dei ville heller at bildet skulle vera frå Lyngheim. At du finn treet kjend som «apenes skrekk» i begge parkane, var nok med på å gjera oppgåva ekstra vanskeleg.
Og gårsdagens vinnar blei ...
I går hadde vi bilde frå Ervikane/ Litle Hestholmen og frå Borgly, gapahuken på Borgafjellet.
Blant mange som hadde rett svar på begge bilda har vi plukka ut Odd Martin Torget som gårsdagens vinnar.
Dei som sendte riktige svar på begge bilda var med i trekninga av eit gåvekort på AMFI Os eller i Os sentrum (ditt val) på 300 kroner.
Alle vinnarane vil bli kontakta denne veka.
Midtsiden vil gratulera alle vinnarane, og samstundes takka alle som deltok i konkurransen!
