Lokal | 13. aug. 2009

Takkar for invitasjonen

Hytteeigarane Tone Svenkerud og Bill Schjelderup har alltid følt seg velkomne i Os, ikkje minst etter at dei blei invitert til å vera med på å finansiera kunst- og kultursenteret som er under bygging.

Takkar for invitasjonen
Kjetil Vasby Bruarøy
Kjetil Vasby Bruarøytorsdag 13. aug. 2009 08:22

Bildeserie:

1 av 6

− Brevet frå ordføraren var så godt skrive at det trefte oss rett i hjarta, seier bergensaren Bill Schjelderup.

Han og kona Tone sat saman med fleire venar som også har hytte i Os kommune laurdagskvelden etter at dei hadde fått invitasjon frå OKK-kampanjen.

− Sjølv om det var pengestøtte kommunen bad om i brevet, såg vi alle på det som ein positiv gest å bli invitert til å bidra.

− Ideell for hyttefolk
Bill har vore mykje i Os i barndomen, og hadde overtatt og pussa opp ein fritidsbustad på Halhjem då han og Tone i 2003 fekk sjanse til å kjøpa Inste Gulholmen med hytte og naust.

− Vi reiser aldri andre stadar enn her på Gulholmen om somrane, Os er utruleg godt tilrettelagt for hyttefolk, seier Tone, og ramsar opp Os hamn, Vedholmen Landhandel, det rolege tempoet og det dei opplever som venlege og gjestfrie osingar i butikkar og restaurantar.

− Eg er berre ein halvtime frå kontoret, men her står tida stille. Det er utruleg kor fri og avslappa vi blir av å vera på hytta. Det som er kjekt er at også døtrene vår, som byrjar å bli vaksne, liker seg her og tar med venar på besøk. Eg trur faktisk dei har ventelister på venar som vil vera med, seier Bill og ler.

Eventyrleg å bygga
Schjelderup meiner at noko av det som er med på å gjera Os attraktiv er måte kommunen handterer byggesakar på.

− Det er eit eventyr, seier han, og siktar ikkje til ja-haldning eller vilje til å gje dispensasjonar i strandsonen.

− Servicen og effektiviteten er unik, i Os treff vi hjelpsame folk som fortel korleis krava er og kva som går an å få til. Slik sparar dei både oss og sikkert seg sjølv også for mykje arbeid.

Hytta som står på Gulholmen blei bygd av den islandske skipsreiaren Sverre Sturlung rundt 1920. Den står nesten som før, men gjestehytta har fått eit flott tilbygg.

− Holmen var overgrodd då vi overtok, men etter rydding og vasking oppdaga vi både flotte bygningskvalitetar og spennande møblar. Vi kunne ikkje riva hytta.
Bruk av lokale handverkarar var også ei samanhengande positiv oppleving for hytteeigarane frå Bergen.

Betre somrar med Oseana
I sommar har dei vore på konsert i Rosendal. Når Oseana opnar hausten 2010, og spesielt sommaren 2011, reknar Tone og Bill med liknande flotte opplevingar på Os.

− Frå før har vi hatt stor glede av Skulptursymposiet, og vi er sikre på at vi kjem til å ha stor glede av både utstillingar og framsyningar på Oseana med tida.

Dei har kjøpt folkeaksje privat, og Bill har med selskapet Bergen Energi kjøpt stolsete i senteret.

− No som det er litt vårt følgjer vi ekstra godt med på kva som skjer, å få vera med å bidra får oss til å føla oss endå meir inkludert i bygda, seier Bill.

Spennande? Vil du ha ukas høgdepunkt i innboksen?

Les meir om

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.