Tapte på bortebane

Fredag og laurdag har 6 av dei 7 seniorlaga i Os vore i sving.

Serieleiarane Os og Lysekloster i 3. og 4. divisjon tapte sine kampar, og Søre Neset tapte for serieleiar Bremnes heime medan Søfteland slo serieleiar Fotlandsvåg.

Derbyen Nore Neset - Lysekloster 2 enda uavgjort, noko som gjorde at Lysekloster 2 no er tangert i poeng og forbigått på målforskjell på tabellen. Nore Neset ligg på 4. plass 4 poeng frå toppen.

3. div.: Stord - Os 4-2 (les meir om kampen under)
4. div.: Brann 3 - Lysekloster 4-3
5. div.: Søre Neset - Bremnes 0-2
6. div.: Søfteland - Fotlandsvåg 4-2
6. div.: Nore Neset - Lysekloster 2 3-3

Os 2 speler borte mot Olsvik søndag kveld.

Stord - Os 4-2 (3-2)

Målskårarar, Os: Anders Kinden og Preben Borgen (straffe)

Os: Anders Kloven - Torkel Hjertnes, Tore Valvik, Per Søgnen Merai, Vegard Engelsen Moberg (Ramo Racic) - Simen Lassen, Stian Lunde - Fredrik Heggland, Anders Kinden (Tor Erik Kjosås Berge), Preben Borgen - Christer Olsen.

Os har hatt problem med å ta Stord før, både i 2. og 3. divisjon. I 2010 blei det 2-1-siger på heimebane, i fjor tapte Os begge oppgjera mot Stord (3-2 borte og 0-1 heime).

– Vi spelte godt i starten og kunne fint ha skåra 2-3 fleire mål dei første 20 minutta, men var litt uheldig, blant anna med spretten på ballen i avgjerande situasjon, seier assistenttrenar Tore Nielsen.

Stord tok leiinga i 10. minutt, Anders Kinden utlikna for Os i 15. minutt. I 44. minutt sikra heimelaget seg leiing til pause.

– Stord auka til 3-1 i 57. minutt, og då gjekk lufta litt ut av oss, fortel Nielsen.

Skåra på straffe

Os fekk straffe då Torkel Hjertnes blei tatt av keeper i 75. minutt. Preben Borgen reduserte for Os frå 11-metersmerket.

Rett etterpå skåra Stord igjen og 4-2 sto seg ut kampen.

Søndagskamp neste helg

Sandnes Ulf 2 slo svake Avaldsnes berre 3-2 i dag.

Arna Bjørnar slo Bjarg 2-0.

Her kan du sjå tabell og fleire resultat frå runden.

Os speler neste kamp på heimebane mot Kopervik søndag om ei veke (kl 19).