Tar debuten i Os
GasGasGas: Tre kameratar frå Bømlo og ein bassist frå Tyskland går på scenen saman for første gong når dei fredag inntar Bar2Be.
– Vi har eigentleg spelt saman sidan vi var veldig unge, men det var først sommaren 2010 at vi lagde band i lag, fortel vokalist Richard Ekornsæter.
– I mellomtida spelte vi med ulike andre band, med GasGasGas søkte vi etter bassist og fann ein dugande tyskar, legg han til.
Invitert til Os
Richard har med seg barndomskameratane Knut Eivind Habbestad på gitar og Ståle Fylkesnes på trommer. Dei tre er frå Bømlo, men bur i Bergen.
Bassisten heiter Simon Futterlieb.
– Eg gjekk på Noroff, der eg utdanna meg innan musikk og lydteknikk, saman med osingen Adrian Valle. Det var han som ordna oss debutkonsert på Os.
1 dose blues + 3 dosar metal
Ekornsæter seier han har besøkt Os før, eller rettare sagt Søfteland Rock N LoL. Han kjenner også til at Os har eit levande bluesmiljø og ein god festival innan blues og jazz.
– Vi i bandet har kvar for oss litt ulike retningar av musikk vi liker. Medan dei tre andre varierer mellom rock og metal er eg meir blues. Saman blir vi ei fin rock n roll-blanding, eg håper hard bluesrock kan treffa mange i Os.
Eigne låtar og litt cover
– Blandinga av sjangrar som interesserer oss er spennande, men av og til også ei utfordring. Som når vi lager nye låtar. Låtane blir liksom aldri heilt ferdig, ler vokalisten.
– Men var har rundt 10 eigne låtar og har ambisjonar om å spela inn nokre av dei til hausten. I tillegg har vi eit par coverlåtar vi vil testa ut på vårt første LIVE-publikum fredag.
Vil du ha ein forsmak på fredagens konsert kan du høyra GasGasGas på Urørt.