Os-spelar Mats Cato Moldskred vil laga ein aktivitetsdag med og utan ball før fri entré på heimekampen laurdag 1. september. (Foto: Kjetil Vasby Bruarøy)

Tar idé frå Kongsvinger til Os

Laurdag 1. september skal bli ein spesiell dag på Kuventræ.

Av: Kjetil Vasby Bruarøy

Mats Cato Moldskred gjekk frå OBOS-ligaen til 4. divisjon då han kom heim frå Kongsvinger for å hjelpa moderklubben Os opp igjen i divisjonane.
Med seg frå Kongsvinger har han erfaring frå meir enn det som skjer på banen.

– Det er ikkje Kongsvinger sin idé, eg lurer på om dei adopterte den frå ein annan større fotball- eller handballklubb. Men uansett er det noko vi kan ta utgangspunkt i her på Kuventræ, og vi vil gjera det på vår måte, seier Moldskred.

Gratis aktivitetsdag med fri entré på kamp

Ideen handlar om å laga «Barnas Dag», ein open og gratis aktivitetsdag for born i alle aldrar, med eller utan følgje av foreldre - med og utan ball.

Etter at aktivitetane er over kjem alle som vil, ungar og vaksne, gratis inn for å sjå Os-kamp, som denne dagen går mot Loddefjord. Inngangspengane blir sponsa av næringslivet, som gir ei krone eller meir per tilskodar som ser kampen.

– I Kongsvinger kallar dei det for «Krone-Kampen», og den er ganske innbringande økonomisk. Publikumstalet der borte blei gjerne dobla frå 1700 til 3500 og mange er med og støttar med ei krone eller fleire per hovud.

– I breiddeklubben Os har vi ikkje ambisjonar om at det skal bli så høge inntekter, men vi har målsetnad om at det skal bli ein veldig kjekk dag for alle, både før kampen og under kampen. Vi skal bli best på innhald, så får evenuelle overskot bli ein bonus.

Vil kopla idrett og musikk

Mats Cato har så vidt byrja å kontakta ulike bedrifter i Os, og fått ja av alle dei fem første.

– Nokre er med på éi krone, andre har dobla til to. Det er vanskeleg å veta kor mange som kjem, men det er greit for sponsorane å veta at det kan bli tusen på tribunen denne dagen.

Moldskred held no, saman med arrangementskomiteen, på å laga program og planlegga aktivitetar for dagen.

– Vi tar heile Kuventræ i bruk og ønskjer å ha eit stort utval med alt frå hoppeslott til fotball og andre idrettar og leikar. Vi ønskjer òg å kopla idrett og kultur, og jobbar med å få inn nokre musikk som pauseinnslag.

Fleire saker