Tar nettene til hjelp

Bildeserie:

1 av 5

- No har vi nettopp kome fram til Sandnessjøen. Sidan sist vi snakka saman (25. juni, red. anm) har vi rodd 500 nautiske mil, og vi har 500 mil igjen, sa Bård til midtsiden.no tysdag.

Han reknar med at dei tre er framme ved målet, Nordkapp, om cirka to veker.

Motvind på dagtid
Den siste tida har Bård, Tor Wigum og Vegar Solberg hatt motvind i oselvaren på dagtid, derfor ventar dei til natta med å ro.

- Vi plar venta til 23-tida om kvelden, og så ror vi til rundt 16-tida neste dag. Då får vi best forhold, og sjølv om vi ikkje har kome heilt opp til midnattsola endå, er det meir enn lyst nok til å ferdast på sjøen i robåt, seier Monsen.

Flott natur
Onsdag 17. juni starta den 2165 km (cirka 1170 nm) lange roturen frå Lindesnes til Nordkapp. Bortsett frå første dag har ikkje ekstrem-roarane hatt noko ferskvatn å ausa på.

- Til no har vi vore heldige, også utstyret har heldt mål. Bortsett frå eit liggeunderlag der delar av innmaten rauk. Nokre innvendige veggar skulle halda formen på madrassa, men no er den omtrent som ein ballong. Vi håpar på å finna ein sportsbutikk snart.

Når dei ikkje søv har gutane mykje fint å sjå på.

- Vi har sett ein god del sel, og nyleg rodde vi forbi dei flotte fjella De syv søstre (Botnkrona på 1072 moh som høgaste) og Torghatten (258 moh, med det karakteristiske holet i veggen), seier Bård Monsen.

På roturen.com kan du sjå fleire flotte bilde frå turen (trykk "galleri" i menyen øverst), og via "spot" kan du sjå kvar dei er.