Tatt hand om to gongar
Politiet måtte to gongar torsdag ta hand om same mann. Dei tok beslag i knivar og narkotika og kjørte mannen på legevakt.
Politiet fekk i 13-tida torsdag melding om ein svært rusa mann i Os sentrum.
- Då mannen blei kontakta av patruljen viste det seg at han hadde to knivar og noko narkotika på seg.
- Dette blei beslaglagt på staden, fortel lensmann Rasmus Dalen.
Patruljen vurderte tilstanden til karen som såpass bra at han blei dimitert og skulle kome seg heim på eigen hand.
To timar seinare, i 15-tida, fekk dei på ny melding om ein rusa person.
- Denne gongen frå eit legekontor som ønskja hjelp til å få fjerna ein rusa person vekk frå venterommet.
- Då patruljen kom til staden viste det seg at det var same mann som dei hadde vore i kontakt med i sentrum tidlegare på dagen.
- Politiet tok han med seg, men han blei dårlegare og dei fann det naudsynt å ta han med til legevakt, seier Dalen.
På legevakta blei mannen overlatt til helsepersonalet for vidare oppfølgjing.