Taubane til Borgafjellet?

Bildeserie:

1 av 5

Sommaren 2017 fekk Os kommune 95.000 kroner frå Hordaland fylkeskommune til forprosjekt om taubane til Borgafjellet (353 moh).

«Som en del av turismesatsningen, ønsker vi å utrede muligheten for å etablere taubane fra Os sentrum til toppen av Borgafjellet, for å gjøre fjellet og utsikten mot fjord, fjell og bre (Folgefonna) tilgjengelig for flere enn lokalbefolkningen, for turister, besøkende og bevegelseshemmede» skreiv næringssjef Daniel Skotheim i søknaden.

I går reiste Skotheim til Loen Skylift på studietur saman med ordførar Terje Søviknes, prosjektsjef i Os kommune, Halvor Hanevik, næringskonsulent Jon Sivert Rykkel og leiar i VisitBjørnafjord, Hans Parnefält.

Tusen meter opp frå sentrum

Loen Skylift og Hoven Restaurant blei opna av Dronning Sonja 20. mai 2017. Pendelbanen er ein av dei brattaste i verda, og løftar folk frå fjorden i Loen til fjellet Hoven (1011 moh) på fem minutt. På toppen ligg Hoven Restaurant med 350 sitjeplassar.

– Eg står no og ser på basehopp-platået under restauranten. Både prosjektet og utsikta er spektakulær. Loen og Os er ulik, men prosjektet har likevel fleire element som er veldig interessante for oss, seier Daniel på telefon med Midtsiden.

Loen Skylift med restauranten på toppen fekk ein prislapp på rundt 300 milionar kroner. Prosjektet blei finansiert av eit spleiselag som blant anna besto av hotellet i Loen, kommunen og ulike firma. Privatpersonar var inne med alt frå 50.000 kroner til ein million i aksjar.

– Dei budsjetterte varsamt med 55.000 gjestar i året, til no i år har banen og restauranten hatt 105.000 gjestar. Hotellet i Loen har hatt ei auke på 20-30 prosent.

Hårete idé for å fargelegga eit svart hol

Skotheim har ikkje berre hausta skulderklapp etter at han i fjor sommar fekk merksemd for søknaden og midlane han fekk frå fylket.

– Målet er å prøva å skapa ein attraksjon, anten det blir taubane eller noko heilt anna. Midthordland treng det. Bergen, Voss og Hardanger skaper mykje saman, mens vår region har mange gode attraksjonar, men på turistkartet i stor grad er eit svart hol.

– Å seia at du vil laga taubane til Borgafjellet er ein litt tabloid og brutal måte å gjera det på. Enkelte har sagt at dei synest ideen er god, andre begriper ikkje kva vi skal med ein taubane. Eg trur at uansett kva idé av dette kaliberet som hadde blitt lansert, så hadde du fått tilsvarande blanda tilbakemeldingar.

– Har det ikkje kome nokre konstruktive tilbakemeldingar, forslag til andre fjell, attraksjonar på toppen eller heilt andre prosjekt som kan lokka turistar?

– Jau, det har det gjort, og dei set vi veldig stor pris på. Det er ikkje sikkert at taubane er det beste, men ved å starta ein plass så set du i det minste i gang ein prosess. Folk byrjar å tenkja, duhentar inn gode eksempel og nye og betre idear kan dukka opp.

– Kva skjer vidare?

– Når vi kjem heim vil vi samla inntrykka og fordela arbeidsoppgåver. Det er dette prosjektet vi i denne omgangen har fått pengar til, og då må vi gjera det så grundig vi kan. Dei første tinga vi må finna ut av er om det kan vera økonomisk bærekraft i ein taubane til Borgafjellet, og om samfunnsmessige og biologiske konsekvensar av ein slik installasjon.