– Telefonen ringer i eitt

Startdato for årets fiske i Oselvo er førebels ikkje heilt avklart. DN (Direktoratet for naturforvaltnng) kom med forslag om start 15. juli i år, mot 1. juli i fjor, 15. juni i 2010 og 1. juni i 2009 og fleire av åra før.

Grunneigarlaget kjempar imot reduseringa, som er frå 15 til 8 veker på tre år. Ikkje berre grunna rekordfisket i fjor, men fordi dei meiner yngelsituasjonen er god og at DN baserer avgjerdene sine på feil grunnlag.

Les òg: Ikkje nøgd med nye fisketider

– Det er klage inne no, for andre gong. Vi har ikkje fått svar, og visst vi får endra tidene må vi gå ein ny runde med sal av fiskekort på opningsnatta og dei første vekene, seier ny leiar i fiskeutvalet i Os jakt og fiskelag, Kjell Mikkelsen.

God start likevel?

Førebels jobbar fiskeutvalet som om 15. juli blir ståande som startdato for årets fiske.

Søndag 20. mai hadde dei utlegg av fiskekort til medlemmane, dei med og dei utan utført dugnad, i går opna salet av fiskekort til gemene hop.

– Telefonen har ringt i eitt den siste veka, interessa ser ut til å vera veldig stor, seier Hallgeir Fosså hos MX Sport, som sel fiskekorta og kort til "Kremretten" lengre oppe i elva.

Så er det berre til å håpa på ein våt julimånad ...