Testa justert spelestil i to treningskampar

Os/Nore Neset har utvida frå eitt tilto ellevarlag, og speler i 3. og 5. divisjon i årets sesong.

Ørjan Sandal og Stian Kvåle trener laga saman, og duoen skal vera i lag om å leia begge laga i kamp.

Til no har dei spelt to treningskampar.

– Justerer oss etter overgang til senior

Mange av spelarane på dei to damelaga stammar frå den sterke 2003-årgangen. Laget blei kretsmeistrar i J17 både i fjor og året før, sjølv om det først er i år dei fyller 17.

Ein del av desse spelte mykje seniorfotball i fjor, men ikkje alle.

– Med overgang til senior kan jentene venta seg å møta større og sterkare damer, kanskje også raskare jenter, enn dei har spelt mot før. Derfor justerer vi litt i måten vi speler på, spesielt i det offensive, altså når vi har ball, seier Ørjan Sandal.

Laget ønskjer i størst mogleg grad å unngå å spela mot komande motstandarar i årets serie, og det er berre éi 3. divisjonsavdeling i bergensområdet.

Når dei i tillegg vil øva på å ha ballen mykje, blir det flest treningskampar mot lag frå 4. divisjon.

– Unntaket blei Sotra, som kom på 2. plass i vår avdeling i fjor, sidan det er så tidleg i sesongen.

Éin siger og eitt tap

Mot Sotra borte i hallen på Straume blei det 3-1-tap.

I tillegg har Os/Nore Neset spelt mot Bjarg frå 4. divisjon. Der fekk dei brukt 20 spelarar frå 3. og 5. divisjonstroppane, der alle fekk minst ein heil omgang med speletid.

Til pause sto det 1-1, Os/Nore Neset vann til slutt 6-1.

Tett med kampar etter treningsleir på Kypros

Heile seniorgruppa til Os /Nore Neset reiser, saman med A-laget på herresida, på treningsleir på Kypros i vinterferien (veke 9).

– Vi har ikkje fleire treningskampar før avreise, vi har først og fremst fokus på å trena mykje og å trena ganske hardt.

– Men vi skal ha minst fem treningskampar i mars og fram til påske i april.

Blant motstandarane er Bergen Nord, Olsvik og Askøy.

– Då ligg det òg an til at vi tar ein tur til Haugesund for å spela mot eit lag frå eige nivå.