Tett og jamnt då Lysekloster tapte

Sju gule kort kunne tyde på ein stygg kamp, men det var det ikkje i følgje Lysekloster-trenar Ruben Hetlevik.

– Det var ein jamn og tett kamp, men ikkje stygt. Dommaren får nok ta litt av skylda for at han ikkje hadde heilt kontroll, men eg meiner begge laga spelte fair.

Fyllingsdalen - Lysekloster 2-0 (1-0)
Lysekloster: Thomas Hille, Mats Joachim Walberg, Szymon Walczak (Truls Hovland, 65. min), Thorvald Tætteberg, Denis Ljubovic, Mohammad Rahmani, Rune Åsheim MO, Vladan Radojkic, Martin Pedersen, Kristoffer Østervold, Even Vetås (Marcus Thormodsen 76.min).

Måla til Fyllingsdalen kom etter ein corner og etter at bakerste mann i Lyseklosterforsvaret mista ballen.

– At dei kjempar inn ein corner er så, men vi gir dei det andre målet då vår bakerste mann mister ballen litt ut av det blå og dei kjem aleine med keeper.

– Utover det får ikkje Fyllingsdalen dei store sjansene. Dei har ei før dette og ei i løpet av dei ti siste minutta då vi satser alt framover. Fyllingsdalen var effektive og skåra på to av fire sjanser, vi gjorde det ikkje.

– Var det det som var forskjellen på laga?

– Njaa, det var vel det, seier Hetlevik og trekk litt på det.

– Det var ingen av laga som dominerte kampen, vi bytta på å ha initiativet. Det var ein viktig kamp for begge laga, men Fyllingsdalen skårte på sine sjanser og vi gjorde det ikkje, så det var vel det som var forskjellen i dag. I tillegg til at vi gir vekk eitt mål.

Lysekloster tek med det sommarferie på tredjeplass med 22 poeng. Seks mindre enn Sotra på førsteplass.

Neste kamp går heime mot Stord 22. juli klokka 18.