– Til dei gradar tett på tida vi lever i

«Gratis og uforpliktande verdivurdering» er basert på boka til Marit Eikemo, og det er første gong ei av bøkene hennar blir til teater.

Fredag 28. januar har stykket premiere i Førde, før det skal ut på ein fire veker lang turné til kulturhus og idrettshallar i heile Vestland.

Stykket kjem til Oseana kunst- og kultursenter 5. februar.

— Handlinga i «Gratis og uforpliktande verdivurdering» er så til dei grader tett på tida vi lever i, seier teatersjef Cecilie Grydeland Lundsholt.

Opptatt av grunnar for vala til moderne menneske

Det startar med at draumehuset dukkar opp på Finn, og vi følger Hanne og Andreas i dagane fram mot bodrunda.

Hanne er hovudkarakteren. Ho lengtar etter einebustad med hage. Betre tid, betre plass og betre rammer for kvardagen.

Viss dei berre får kjøpt det huset, så skal ho få kontroll på rotet. Ho vil begynne å trene, utvikle karrieren, få det betre med mannen sin og bli ei betre mor.

Som samtidsforfattar er Marit Eikemo opptatt av kva som ligg til grunn for vala moderne menneske tar.

— Huset er livsviktig for Hanne. Det representerer fellesskapen som ho lengtar så frykteleg etter, det å høyre saman med nokon. Huset skal på sett og vis ramme inn draumane hennar, seier ho.

Det er Hanne som driv handlinga framover. Andreas er meir passiv og unnfallande.

— Ein av bokas store ironiar er kor langt ho er villig til å gå i sitt soloprosjekt for å oppnå det fellesprosjektet ho ser for seg. Ho går over streken, og kanskje er det nærliggande å føle sympati med Andreas, men synda hans er at han tar altfor lett på det som er størst for henne, seir Eikemo.

Marit Eikemo prøver aldri å vere humoristisk når ho skriv, men like fullt fortel lesarane at dei ler og ler.

— Hanne ser for seg at alt skal ordne seg når ho får huset. Ho skal få lyst til å jogge og presse juice om morgonen, og ho førebur seg på storinnrykk av gjester. Det kan vi kjenne att. Vi set vår lit til desse tinga, sjølv om vi inst inne veit vi at livet ikkje er slik, seier Marit Eikemo.

Stykket kjem til Oseana kunst- og kultursenter 5. februar.