Sport | 10. feb. 2011

Til EM i Serbia

Åsmund Slettevold har fått A-kontrakt med landslaget. I går reiste han til Serbia for å delta i junior-EM.

Til EM i Serbia
Kjetil Vasby Bruarøy
Kjetil Vasby Bruarøytorsdag 10. feb. 2011 11:26

Åsmund Slettevold har fått A-kontrakt med landslaget. I går reiste han til den serbiske byen Novi Sad for å delta i EM i karate.

- Åsmund, som fyller 16 år i mars, har vore så suveren her på Vestlandet at eg har frykta at vi ikkje skulle klara å gje han den oppfølginga og matchinga talentet hans fortener. Eg er veldig glad for at han har fått kontrakt, og eg ser allereie at han blir tatt godt hand om av landslagsleiinga, seier hovudtrenar for organisasjonen Os Karateklubb er medlem av, WIKF Norge, sensei Cato Bruarøy.

Fleire osingar, blant anna Åsmund og storebroren Erlend, har hevda seg internasjonalt dei siste åra, men det har vore innan stilarten wado, der begge Slettevold-brørne har tatt EM-tittelen.

No er det allstyle-landslaget det er snakk om, og Åsmund er første osing på 15 år med landslagsplass.

- Også Erlend Slettevold og Henrik Reed-Larsen har trent med landslaget den siste tida. Kven som får kontrakt i dei eldre klassande skal ikkje vera avgjort enno, men om nokre veker skal dei to kjempa i uttaksstemnet Dutch Open i Nederland.

Store treningsmengder
Saman med stort talent skal enorm treningskapasitet og vilje vera årsaka til dei gode resultata hos dei fremste karateutøvarane i Os.

- Med A-kontrakt følgjer plikter, blant anna til å stilla på treningssamlingar og å skriva treningsdagbok som følgjer eit intensivt opplegg frå landslagsleiinga.

Trass i at karate handlar mykje om teknikk og taktikk, blir det stilt strenge krav til landslagsutøvarane si fysiske form.

- Det blir ingen brå overgang for Åsmund. Då han såg på opplegget spurte han meg faktisk kva han skulle kutta ut for å koma ned på same tal treningstimar i veka, ler Bruarøy.

Åsmund deltar i -70 kg kadett når han i helga går på matta i Serbia.

Ekstern lenkje:
Uttaket til EM

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.