Maren Evensen får tøff konkurranse i banefinalen, kor heile 47 skyttarar har 250 poeng før finalen (arkivfoto: Andris Hamre)

Til finale med fullt hus

Skyhøgt nivå på Landsskytterstemnet. 47 skyttarar med 250 poeng i klassa for eldre rekrutt. Ei av dei frå Os.

Av: Andris Hamre

Landsskyttarstemnet bryjar å dra seg mot finaledagane, med osingar i særs mange finalar.

– Kor mange det er no har eg rett og slett ikkje oversikten over. Vi var 11, men det har vel kome til minst eit par til i dag, fortel Jan Kristian Evensen på telefon frå Stjørdal.

I rekruttklassa er allereie finalane i baneskytinga unnagjort. Der endte Adelheid Møller Røttingen på 344 og Celine Daviknes Hårvik på 337 etter ei litt skuffande finaleskyting, men dei to jentene får sjansen på nytt når dei skal ut i feltfinalen saman med Daniel Myklebust Fjellstad. Adelheid går til finalen med 30/18, Daniel med 29/20 og Celine med 29/14.

To finalar på Maren

Maren Evensen har hatt ein god sesong så langt, og har levert også under landsskyttarstemnet.

Ho er klar for banefinalen med 250 poeng etter grunnlaget og for feltfinalen med 30/21.

– I den klassa er det eit skyhøgt nivå i år, med heile 47 skyttarar som har 250 poeng på bane. I feltskytinga er det minst like høgt, fortel far Evensen som også har grunn til å vera nøgd med dei to andre døtrene.

– Amalie skaut innleiinga på bane i dag og endte på 246 poeng. Ho var allereie klar for feltfinalen med 27/9. På bane ligg ho på fjerdeplass med same poengsum som dei tre foran ho.

Sofie Evensen er klar for feltfinalen med 29/17 og er nettopp ferdig med baneskytinga.

– Der fekk ho ein 9,9 på 10 skudden, seier Jan Kristian Evensen medan Midtsiden snakkar med han. Med ein niar også i den andre serien, så enda ho på 248, men finalegrensa er enno ikkje satt.

– Det kan vera at den hamnar på 247, det er heilt avhengig av korleis det går med dei andre skyttarane utover dagen.

Tøffe finalar

Med mange osingar finaleklarer står det att fleire spennande dagar for osingane i Stjørdal.

– I alle finalane handlar det om kven som fyller flest innerblinkar. Maren har vist at ho kan det, men landsskytterstemnet er landsskytterstemnet.

– Odd Gorm-Hansen i V73 er i banefinalen med 249. Han er eitt poeng bak, men du veit aldri med veteranane. Det kan godt vera at han kan ta det heim. Det er det som gjer skyting så spennande, avsluttar Evensen.

Andre finaleklare osingar per no er Oddvar Drange - V65 (249 på bane), Arvid Austefjord - V55 (244 på bane), Arild Røyseth - Klasse 3-5 (29/21 på felt), Oddvar Eikemo - V73 (30/17 på felt).

Fleire saker