Til sjukehus med kutt

Kjetil Vasby Bruarøyfredag 28. aug. 2009 12:40

Os brannvesen måtte fredag rykka ut som "first responder" på eit arbeidsuhell ved ein byggeplass bak Amfisenteret.

- Ein mann i 30-åra hadde fått eit stygt kutt ved handleddet i eit uhell med ei sag, fortel brannsjef Stein Gjøsund.

Kollegaer av den uheldige tømraren kjørte først til lokal legevakt med pasienten, men der var ikkje lege inne. Så prøvde dei ambulanse, men den var også på oppdrag.

- Då dei ringte 113 fekk vi oppdraget. Eg vil oppfordra folk som er involvert i ulykker å oppretta kontakt med nødsentralen så snart som mogleg, så sender dei raskt ut ledig eining, seier Gjøsund.

Brannvesenet rykte ut med tre mann og møtte pasienten utanfor legevakta. Her tok dei han inn i bilen og stoppa blødninga. Mannen er no på veg til Haukeland i ambulanse.