Tjuvstarta i Vikedal
Karoline Breivik var litt for rask på avtrekkaren då ho i helga avslutta sesongen i Vikedal.
I helga var bilcrosskjørar Karoline Breivik i Vikedal for å kjøra sitt siste løp for sesongen.
– Ho hadde to tjuvstartar på rad i første heat, den eine var nok litt strengt dømt, men det blei likevel sisteplass i dette heatet, fortel bestefar og støtteapparat Håvard Gåssand.
I begge dei to neste heata blei det 4. plass blant dei 6 i hennar avdeling, dermed landa ho på 20. plass og fekk ikkje kjøra finale.
– Vikedal blei ikkje fullt så bra som venta, men sesongen sett under eitt har vore veldig god og framgangen hennar har vore heilt strålande, synes Gåssand.
Karoline byrja å kjøra i fjor haust og har i løpet av 2012 både tatt sin første heat-siger, sin første finaleplass og vore éin plass frå A-finale då ho tidlegare i oktober leverte årsbeste på Eikås.