Tøff med 10 mann
Os 2 leia to gongar over sterke Lyngbø, men måtte med 10 mann nøya seg med poengdeling.


– Eg held fram med å bli imponert over den arbeidsmoralen desse unge spelarane viser, også etter at dei får ein mann utvist, seier leiar i sportsleg utval i Os Turn Fotball, Roald Stigen.
Os 2 spelte måndag kveld heimekamp mot Lyngbø. Før møtet med Os 2 hadde Lyngbø vunne to kampar og spelt éin uavgjort.
– Det er tydeleg at omlegginga av 3. divisjon i fjor har gjort nivået ein del høgare i 4. divisjon. Men dette taklar Os 2 bra, blant anna grunna at heile laget responderer på engasjerte meldingar frå trenarane, seier Stigen.
Os 2 - Lyngbø 3-3 (1-1)
Mål, Os: Christer Olsen, Egil Thuen og Martin Eidsvik
Fint samspel i høgt tempo leia til at Christer Olsen, som skåra både i førre A-lagskamp og førre kamp med Os 2, kunne gje heimelaget leiinga. Gjestane fekk kjørt seg godt og var heldige då dei utlikna før pause.
Utvising, straffe og ny leiing
På stillinga 1-1, rundt 15 minutt ut i 2. omgang, blei midtstoppar Børge Borgen utvist for andre gong til no i sesongen. Straffesparket gjekk inn og gjestane var i føringa.
– Her viste spelarane ein heroisk innsats og kjempa seg med 10 mann opp i ny leiing, eg blei stolt i går, seier trenar Einar Nytræ.
2-2 kom ved innbytar Egil Thuen, 3-2 ved Martin Eidsvik.
– Gutane sto godt imot presset vi fekk på oss på slutten av kampen, men utlikninga kom og 3-3 var kanskje greit slik kampen utvikla seg.
Tett program
Os 2 avslutta med to seniorar, to gutespelarar og resten junior. Spelarane har tett program med trening og kamp for tida, i kveld speler Os junior elite mot Fyllingen på heimebane (kl 20).
– Fredrik Heggland spelte i går sin tredje kamp på fire dagar. Ei hard helg på regionssamling i Stavanger hindra han ikkje i å yta ein knallgod innsats for Os 2, seier Stigen.
Os 2: Anders S. Strønen, Stian Bakke, Børge Borgen, Dani A. Bergstø, Håvard Grøteide, Fredrik Heggland, Martin Eidsvik, Johannes Jordal, Tor-Erik Berge, Mats Lepsøe og Christer Olsen.
Innbytarar med speletid: Egil Thuen og Ruben Aasen.
Os 2 ligg på 7. plass med 5 poeng etter sesongens 5 første kampar (1-2-2).
SJÅ TABELL