Bildeserie:
Klas Færøvik, som byrja med motbakkeløp for nokre år sidan, er tydelegvis på veg tilbake i storform etter at han i haust blei sjuk med kreftsvulst i tunga.
Rett før nyttår var han ferdig med strålebehandinga, søndag sprang han inn på 2. plass saman med Bjørn Tore Kronen Taranger, årets ultraløper i Noreg i 2012, i idrettslaget Varegg sin 6 kilometer lange tomannsstafett.
– Eg er kvitt kreften, men er ikkje helt god igjen etter behandlinga. Men akkurat å løpa går heldigvis bra, seier Klas.
Overraskande og skremmande
Klas fortel at han reagerte med frykt då Bjørn Tore ringte for å invitera han med på stafett.
– Eg sto og såg på handballkamp med ein av ungane, og blei overraska og rett og slett dritredd, ler Færøvik.
– Men så bestemte eg meg for å ta utfordringa, og det gjekk betre enn venta.
3000 meter på 10 blank - i terreng
33 lag stilte til start på Skansemyren i Bergen, i ulike klassar, for å kjempa seg gjennom tre etappar kvar i den 1000 meter lange terrengløypa.
– Då vi prøvesprang løypa såg eg at det var nokre trange passasjar, så eg gjekk ut på førstetappen og tok ein Northug, spurta ut og la meg som nummer to, fortel Klas.
Han enda som nummer 4 på første etappe, men Bjørn Tore sprang inn éin plass.
– Eg blei innhenta på flatene, men gjorde det bra i motbakkane, seier osingen.
Duoen kom i mål på 20:10, Trygve Andresen og Ørjan Nilsen vann på tida 19:48.
– Det var mykje opp og ned og fleire svingar, nokre opp i 180 gradar, så då får det vera bra å springa kvar sine til saman 3000 meter på 10 minutt.
Les meir om løpet og sjå full resultatliste på varegg.no.
Opptur med motbakke
Færøvik, som i 2012 var initiativtakar til Opptur Motbakkeklubb, seier han er meir opptatt av trening enn av konkurransar.
– Det er kjekt å konkurrera litt av og til, men det er løpeturane på fjella i Os eg set mest pris på.
– Og det sosiale med alle dei fine folka i klubben. No er vi ein god gjeng med menn og kvinner i ulik alder og fysisk form som møtest til turar fleire gongar i veka.
I desse dagar blir Opptur Motbakkeklubb også registrert I Brønnøysund som idrettslag.